Vaksinimi kundër gripit sezonal pritet të fillojë javën e parë të nëntorit. Qendrat për Shëndet Publik thonë se janë të gatshme por presin leje nga ministria e Shëndetësisë për të filluar zbatimin e këtij procesi. Për dallim nga viti i kaluar kur interesimi i qytetarëve për vaksinim kundër gripit stinor ishte i ulët si pasojë e pandemisë, mjekët thonë se këtë vit presin që të ketë dukshëm numër më të madh të atyre që duan të imunizohen.
– Advertisements –
Unë mendoj se këtë vit patjetër se do ketë më shumë interesim sepse vazhdimisht na paraqiten dhe pyesin a ka ardhur vaksina kundër gripit, besoj se do ketë shumë interesim. Mendoj se çmimi i vaksinës do jetë i njëjte nuk do ndryshojë, meqenëse ne nuk kemi ende një konfirmim nga ministria e Shëndetësisë presim që të na konfirmojnë çmimin dhe të fillojmë me vaksinim – deklaroi Lulzime Bajrami, Qendra për Shëndet Publik, Shkup.
Ministria e Shëndetësisë thotë se vaksinat pa pagesë për kategoritë e rrezikuara të qytetarëve pritet të arrijnë periudhës që vjen. Ndërkohë vaksinat e tjera komerciale të cilat qytetarët i paguajnë nga xhepi kanë arritur.
MSH firmosi marrëveshje për furnizimin e 40,000 doza të vaksinave kundër gripit. Dërgesa e vaksinave varet nga prodhuesi. Për momentin 40.000 doza janë planifikuar të jenë pa pagesë për kategoritë e rrezikuara të qytetarëve ku bëjnë pjesë të moshuarit mbi 65 vjeç, të sëmurët kronik, gratë shtatzëna dhe fëmijët nga mosha 6 muaj deri në 5 vjeçe – njoftojnë nga Ministria e Shëndetësisë.
Çmimi i vaksinës kundër gripit stinor është 800 denarë. Autoritetet thonë se nuk pritet rritje e re e çmimit. Dy vite më parë vaksina ka kushtuar 600 denarë, ndërsa rritje pësoi vitin e kaluar. Disa vite më herët kjo vaksinë ka kushtuar 400 denarë. Sa i përket pranimit të vaksinës anti Covid dhe asaj kundër gripit sezonal, komisioni për imunizim rekomandon 14 ditë dallim mes njërës vaksinë dhe tjetrës.
Vjollca Aliti
