Sekretari i Partisë së Lirisë, Tedi Blushi, ka reaguar pas zjarrit që përfshiu sot tregun industrial në zonën e plazhit të Durrësit, ku u rrezikuan rreth 20 dyqane të ndërtuara me struktura të përkohshme.
Në një deklaratë të fortë publikuar në rrjetet sociale, Blushi e cilësoi këtë ngjarje si një tjetër dëshmi të braktisjes së qytetarëve nga shteti, duke akuzuar qeverinë dhe institucionet vendore për dështim në garantimin e sigurisë së pronës dhe jetës së njerëzve.
“Pamjet dramatike nga zjarri që po shkrumbon tregun e Durrësit janë një tjetër dëshmi tronditëse e braktisjes së plotë të qytetarëve dhe dështimit të thellë të qeverisë dhe institucioneve vendore,” shkruan Blushi.
Ai thekson se mungesa e përgjegjshmërisë institucionale nuk mund të justifikohet më me mungesën e mjeteve apo burokracinë. Sipas tij, kemi të bëjmë me një shtet që ekziston vetëm në letër dhe propagandë, por zhduket në momente emergjente.
Blushi bën thirrje për një hetim të menjëhershëm dhe të thelluar për shkaqet e zjarrit, vënien para përgjegjësisë të çdo zyrtari që ka dështuar në detyrë, si dhe kompensimin e menjëhershëm të tregtarëve të dëmtuar.
“Shteti nuk mund të jetë spektator përballë fatkeqësisë së qytetarëve të vet,” përfundon reagimin e tij Blushi.
Postimi i Blushit:
Pamjet dramatike nga zjarri që po shkrumbon tregun e Durrësit janë një tjetër dëshmi tronditëse e braktisjes së plotë të qytetarëve dhe dështimin e thellë të Qeverisë dhe institucioneve vendore në garantimin e sigurisë së pronës dhe të jetës.
Papërgjegjshmëria institucionale nuk mund të justifikohet më as me mungesë mjetesh për shuarjen e zjarrit dhe as me burokraci.
Kjo ngjarje është pasojë e një shteti që ekziston vetëm në letra dhe propagandë, por që në momentet e emergjencës zhduket dhe i lë qytetarët në mëshirë të fatit.
Hetim të plotë dhe të menjëhershëm për këtë ngjarje, vënien para përgjegjësisë të çdo zyrtari që ka dështuar në detyrë, si dhe kompensim të menjëhershëm për tregtarët e dëmtuar.
Shteti nuk mund të jetë spektator përballë fatkeqësisë së qytetarëve të vet!
