Aksionet japoneze u rritën në një nivel rekord kur tregjet u hapën të hënën në mëngjes, ndërsa Partia Liberale Demokratike (LDP) e kryeministres Sanae Takaichi shënoi një fitore historike zgjedhore.
LDP siguroi 316 nga 465 vende në zgjedhjet e së dielës, hera e parë që një parti e vetme ka fituar shumicën prej dy të tretash në Dhomën e Ulët që kur parlamenti i Japonisë u krijua në formën e tij aktuale në vitin 1947.
Partia e Inovacionit të Japonisë, partnerja e koalicionit të LDP-së, fitoi në 36 zona të tjera zgjedhore, duke e çuar totalin e tyre të përgjithshëm në 352 vende.
Indeksi Nikkei u rrit me më shumë se 5% në tregtinë e hershme të së hënës, duke kaluar kufirin 57,000 për herë të parë.
Fitorja vendimtare e LDP-së do ta ndihmojë Takaichi-n të përparojë politikat e saj pro-biznes pa pasur nevojë të negociojë gjerësisht me partitë e opozitës.
Takaichi u tha gazetarëve të dielën se do të ndiqte një politikë fiskale “të përgjegjshme, por agresive” dhe nuk do të riorganizonte kabinetin, i cili u formua më pak se 4 muaj më parë.
Kryeministrja e parë femër e Japonisë shpalli zgjedhjet e parakohshme muajin e kaluar, vetëm pak pasi mori detyrën në tetor. Suksesi i saj është në kontrast të theksuar me dy paraardhësit e saj, nën të cilët partia humbi shumicën parlamentare për shkak të skandaleve të korrupsionit dhe rritjes së kostove.
Komentuesit e tregjeve thonë se politikat e Takaichi-t mund të nxisin ekonominë japoneze.
Rezultati i zgjedhjeve dhe lëvizjet e ardhshme si “stimulimi, ndryshimet në taksa dhe derregullimi” do të jenë “karburant shtesë për një trend ekzistues në rritje”, tha për BBC-në analistja e investimeve Yuka Marosek.
Inflacioni historikisht i ulët e ka bërë atë shumë të ndjeshëm ndaj rritjes së kostos së jetesës gjatë viteve të fundit.
Ekonomia është gjithashtu nën presion nga popullsia në plakje e vendit, e cila ka parë një fuqi punëtore në tkurrje dhe kosto të larta të kujdesit social.
Takaichi është zotuar të ulë taksat dhe të nxisë ekonominë japoneze përmes më shumë shpenzimeve – megjithëse se nga do të vijnë këto para është një tjetër shqetësim i madh, duke pasur parasysh borxhin e lartë qeveritar të Japonisë.
Kritikët paralajmërojnë se kjo mund të thellojë paqëndrueshmërinë në ekonominë tashmë të brishtë të Japonisë.
“Ne mbajmë një përgjegjësi jashtëzakonisht të madhe për t’u përqendruar në përmbushjen e vazhdueshme të premtimeve të fushatës që kemi bërë”, tha Takaichi të dielën, ndërsa fitorja e partisë së saj u bë e qartë, raportoi Kyodo.
LDP-ja kishte humbur shumicën parlamentare nën drejtimin e paraardhësit të Takaichi-t, Shigeru Ishiba. Dhe Takaichi mbështetej në thirrjen e saj personale për të ndryshuar fatin e humbur të LDP-së.
Ajo ka konsoliduar mbështetjen midis bazës konservatore të LDP-së duke ringjallur qëllime të lëna pas dore prej kohësh, si rishikimi i kushtetutës pacifiste të Japonisë dhe theksimi i vlerave tradicionale.
Presidenti i SHBA-së, Donald Trump, e përgëzoi Takaichi-n për fitoren e saj, duke shkruar në Truth Social se ishte një “nder” që e mbështeti atë përpara zgjedhjeve.
“Njerëzit e mrekullueshëm të Japonisë, të cilët votuan me kaq entuziazëm, do të kenë gjithmonë mbështetjen time të fortë”, tha Trump./Përshtatur nga BBC/
