Pas marrjes së Erion Veliajt si të pandehur nga SPAK, avokatët e tij kanë reaguar me tone të ashpra, duke akuzuar prokurorinë për rrjedhje të qëllimshme informacioni dhe përpjekje për të “gjykuar” kryebashkiakun e Tiranës në media, jo në gjykatë.
“Po përdoret një procedim penal për të ndërtuar një show publik përmes rrjedhjeve të paligjshme dhe artikujve me porosi. Kjo nuk është drejtësi, por farsë,” thuhet në deklaratën e avokatëve.
Ata pretendojnë se janë shkelur rëndë sekretet hetimore, përfshirë publikimin e dëshmive të dëshmitarëve, dhe se ky është një precedent i rrezikshëm që minon integritetin e sistemit të drejtësisë dhe rrugën e Shqipërisë drejt BE-së.
Sipas tyre, Veliaj është “kryetar legjitim i zgjedhur nga mbi 160 mijë qytetarë” dhe ndodhet nën izolim të pajustifikuar, që sipas mbrojtjes, po i pamundëson ushtrimin e detyrës si kryetar bashkie.
Avokatët paralajmërojnë se po dokumentojnë çdo shkelje për t’i paraqitur më tej dhe janë të bindur se kjo çështje do të shembet kur të përballet me një gjykim të paanshëm.
Reagim i avokatëve të Erion Veliajt:
Ne, avokatët mbrojtës të z. Erion Veliaj, shprehim shqetësimin tonë të thellë për përpjekjet e përsëritura, për të shndërruar një procedim penal në një gjyq publik spektakolar përmes përdorimit të mediave të lidhura me SPAK dhe shkeljeve flagrante të ligjit, siç është zbulimi i paligjshëm i sekretit hetimor. Artikujt me porosi, të paraqitur si “zbulime ekskluzive”, nuk synojnë zbardhjen e së vërtetës, por ndërtimin e një narrative të gatshme publike përpara se çështja të provohet me fakte në një sallë gjyqi.
Këto ditë, detaje të tjera u nxorën në media, përfshirë edhe lidhur me dëshmitë e dëshmitarëve.
Në një shtet demokratik dhe evropian, drejtësia zhvillohet brenda institucioneve të drejtësisë, jo në tituj gazetash, rrjete sociale apo “seriale kriminale” të prodhuara nga media të kontrolluara përmes rrjedhjeve anonime dhe të paligjshme. Edhe më shqetësuese është fakti që këto rrjedhje ndodhin gjatë fazës së hetimeve paraprake, e cila është nën mbrojtjen e detyrueshme të organit që e administron, prokurorisë. Pikërisht këtu dështimi është i pakundërshtueshëm: jo vetëm që nuk është mbrojtur integriteti i procedurës, por është shkelur rëndë parimi i sekretit hetimor, duke e kthyer procesin në një farsë publike.
Ne po dokumentojmë çdo akt që jo vetëm shtrembëron këtë procedim penal, por që gjithashtu cenon rëndë rendin kushtetues dhe standardet evropiane të drejtësisë mbi të cilat mbështetet rruga e Shqipërisë drejt anëtarësimit në Bashkimin Evropian. Kjo çështje përfaqëson një regres të dallueshëm dhe të dëshpëruar drejt një epoke parademokratike.
Veliaj është Kryetari legjitim dhe i zgjedhur në mënyrë demokratike i Bashkisë së Tiranës, i votuar nga mbi 160,000 qytetarë. Megjithëse të drejtat e tij, si edhe ato të qytetarëve që ai përfaqëson, mbrohen nga Kushtetuta e Republikës së Shqipërisë, ai vijon të mbahet në izolim total, nën kushte të ashpra dhe të pajustifikuara kufizuese, që e pengojnë të ushtrojë detyrën e tij si Kryetar Bashkie. Ne jemi të bindur se kur kjo ndjekje penale të vihet përballë një organi të paanshëm gjykimi, ajo do të shembet dhe do të zbulohet për çfarë është në të vërtetë, një ndjekje penale që ka kthyer mbrapsht në mënyrë thelbësore përparimin e Shqipërisë drejt përputhjes me standardet evropiane të drejtësisë dhe shtetit të së drejtës, duke u mohuar njëkohësisht qytetarëve të Tiranës shërbimin e Kryetarit të tyre dhe duke shkaktuar dëm të madh për Tiranën dhe qytetarët e saj.
