Dy drejtues të një autobusi në portin e Durrësit ndodhen në procedim penal pasi tentuan të kalonin bizhuteri me vlerë, të cilat ishin të padeklaruara e njëkohësisht të dyshuara se janë përfituar nga veprimtaritë kriminale.
Uniformat blu kanë identifikuar personin pritës të këtyre aksesorëve dhe po vijon kërkimet për kapjen e tij.
Gjetja e këtyre bizhuterive u bë përgjatë kontrollit në vijë të dytë, në një autobus që kishte drejtues të parë, shtetasin E.N., 34 vjeç dhe drejtuesin e dytë, shtetasin F.R., 37 vjeç.
Ata ndodhen nën hetime për veprat penale “Mosdeklarimi në kufi i të hollave dhe i sendeve me vlerë” dhe “Përvetësimi i parave ose mallrave që rrjedhin nga vepra penale ose veprimtaria kriminale”.
Në kërkim është shpallur shtetasi M.T., 59 vjeç, i cili dyshohet se do të merrte në dorëzim këto bizhuteritë në Shqipëri.
Në cilësinë e provës materiale janë sekuestruar sasia e bizhuterie floriri dhe argjendi, 2 celularë dhe 2 pasaporta.
Çështja i ka kaluar Prokurorisë së Durrësit për veprime të mëtejshme.
Njoftimi i policisë:
Port, Durrës/Vijon zbatimi i planit operacional të përbashkët të Departamentit për Kufirin dhe Migracionin dhe Ambasadës së Mbretërisë të Bashkuar në Tiranë, për parandalimin dhe goditjen e krimeve kufitare.
Konstatohet dhe goditet një rast i tentativës për të futur në Shqipëri, pa deklaruar, sende me vlerë që dyshohet se janë përfituar nga veprimtari kriminale.
Procedohen penalisht 2 drejtues të autobusit ku u gjetën sendet.
Ndërkaq, Policia ka identifikuar pritësin e sendeve me vlerë, dhe vijon intensivisht punën për kapjen e tij.
Sekuestrohen një sasi bizhuterish floriri dhe argjendi, 2 celuarë dhe 2 pasaporta.
Në bazë të analizës së riskut dhe si rezultat i përdorimit të metodave bashkëkohore të kontrollit, që po kryhen në zbatim të planit operacional të përbashkët të Departamentit për Kufirin dhe Migracionin dhe Ambasadës së Mbretërisë të Bashkuar në Tiranë, për parandalimin dhe goditjen e krimeve kufitare, shërbimet e Drejtorisë Vendore për Kufirin dhe Migracionin Durrës goditën në hyrje të Republikës së Shqipërisë, një rast të tentativës për të futur në Shqipëri, pa deklaruar, sende me vlerë.
Nga kontrollet në vijë të dytë, në autobusin që kishte drejtues të parë dhe të dytë, përkatësisht shtetasit E. N., 34 vjeç dhe F. R., 37 vjeç, u gjet një sasi bizhuterish floriri dhe argjendi, të cilat dyshohet se janë përfituar nga veprimtari kriminale. Në vijim të veprimeve procedurale për këtë rast, nisi procedimi në gjendje të lirë për të dy këta shtetas, për veprat penale “Mosdeklarimi në kufi i të hollave dhe i sendeve me vlerë” dhe “Përvetësimi i parave ose mallrave që rrjedhin nga vepra penale ose veprimtaria kriminale”.
Në vijim, si rezultat i hetimeve u identifikua dhe u shpall në kërkim shtetasi M. T., 59 vjeç, i cili dyshohet se do të priste bizhuteritë në Shqipëri. Punohet intensivisht për lokalizimin dhe kapjen e tij.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
