Emisioni Tak Fak ka shkuar nga Tirana në Fshat Laç të rrethit të Kurbinit, për t’u njohur nga afër me shqetësimin e Tom Prendi.
Ai tha se Fran Laskaj ka ndërtuar kasolle me derra mes shtëpisë të tij dhe të vëllait të tij. Laskaj përgjigjet për emisionin, por përgjigja e tij duket paksa “nevrike”.
Gazetarja: Përshëndetje z Tom. Cili është shqetësimi juaj?
Tom Prendi: Para 10 viteve, një person nga Laçi, që quhet Fran Laska, solli 40 koshere bletësh, për t’i vendosur diku në parcelë dhe s’kishte ku t’i kalonte e për ta ndihmuar, i jap çelësat e portës, ai hap dhe portën dhe i vendos përpara shtëpisë sime. Por, me kusht që ai të ndërtonte rrugën e vet, urën e vet dhe pas 1-2 vitesh të kalonte në punën e tij. Por ai tani i ka sjellë bletët shumë afër shtëpisë, dhe më e keqja është se më vonë vjen e ndërton edhe një kasolle bagëtish, mes dy shtëpish, se jemi dy vëllezër që jetojmë këtu e na ka krijuar shqetësime.
Gazetarja: Këtë kasolle e ka ndërtuar në tokën tuaj?
Tom Prendi: Këtë kasolle e ka ndërtuar në një truall, që taksat e truallit ia paguaj unë një më një.
Mark Prendi: Kasollja ka disa muaj që është ndërtuar këtu dhe siç e shihni dhe vetë ka derra brenda. Unë jetoj përditë këtu me gjithë familjen. Këta bëjnë shumë zhurmë, kanë një aromë shumë të keqe. Na e kanë bërë jetën skëterrë. Unë do detyrohem të mbyll dritaret, të mbyll dhe derën, por nuk di se nga të dal. Nuk mund të jetoj më këtu. Edhe bletët na kanë pickuar. Besojmë se “Tak Fak” do ta zgjidhë këtë problem.
Menjëherë pas problemit, gazetarja bisedoi në celular me z Fran Laskaj.
Gazetarja: Si jeni?
Fran Laskaj: Mirë, si jeni ju?
Gazetarja: Ka ardhur një shqetësim që ju keni ndërtuar kasolle derrash në Fshat Laç midis dy vëllezërve Prendi.
Fran Laskaj: Nuk jam sot këtu, jam larg. Kam problemet e mia. Jam në Kukës. Kam të gjitha dokumentet e mia. Është pronësia ime. Kur të më mbushet mendja mu’ do bëj çfarë të dua në tokën time. Dëgjove.
Gazetarja: Ka një ligj, për distancat që mbahen për ndërtimet midis shtëpive, mes objekteve dhe fqinjëve.
Fran Laskaj: Shko te policia, se i ka dokumentet policia.
Gazetarja: Mor zotëri
Fran Laskaj: Nuk po merrem me ty, ik tani në punën tënde.
Gazetarja: Kjo është puna t’ju ballafaqoj të dyja palët.
Fran Laskaj: Ç’punë ke të më ballafaqosh mua? Ik të thashë.
Gazetarja: Unë jam gazetare.
Fran Laskaj: O zonjë, ik të thashë njëherë. Kam problemet e mia. Ai më ka bërë padi në polici, të shkojë në polici.
Gazetarja: Çfarë dokumentesh ke që të më bindësh që nuk i ke rënë në qafë këtij zotërisë?
Fran Laskaj: Po më shqetëson. Unë po them që në momentin që kam qenë në polici, ik vre punën tate. Mbylle telefonin. Do ta zgjidhim tash e mbrapa. Jo të marrë policinë, por të marrë dhe Zotin. Do ta zgjidh unë. Mirupafshim.
Gazetarja ka shkuar pikërisht në Bashkinë e Laçit.
Gazetarja: Na ka ardhur një shqetësim, në redaksinë tonë nga një qytetar, ku në mes të shtëpisë së zotërisë dhe vëllait të tij, është ndërtuar një kasolle derrash. Me ligj është e ndaluar kjo. Nuk mund të jetojnë dot derrat me njerëzit. Ky është shqetësim që nesër mund të kthehet dhe në gjakmarrje, nëse nuk ndërhyhet. Si mund të ndërtohet një kasolle derrash në një zonë të banuar? Kush është instanca që merret me këtë problem?
Zyrtarja e Bashkisë Laç: Bëni një kërkesë me shkrim, e dorëzoj në zyrën përkatëse.
Gazetarja: Pse është kaq e vështirë të marrim përgjigje, kur ne jemi në zyrat e bashkisë?
Zyrtarja e Bashkisë së Laçit: Kështu funksionon. Bëhet kërkesa me shkrim dhe brenda afatit ju merrni përgjigjen.
Tomë Prendi: Jemi interesuar dhe asnjë institucion nuk ndërhyn për këtë problem.
Në lidhje me problemin, ‘Tak Fak’ ka pyetur juristin Alban Duraj, që jep një përgjigje për këtë rast.
Alban Duraj, jurist: Ligji për planifikimin urban, kur ndërtohet një stallë bagëtish ka përcaktuar edhe distancat. Distanca minimale është 50-100 metër për dele e dhi, kurse për derrat distanca është 150-300 metër. Shtetasi që merret me mbarështimin e kafshëve duhet të kujdeset për higjienën. Te kasollja duhet parë cilat janë kushtet higjienike, a ka ujë për pastrim, a ka kanalizim. Për këto probleme, qytetarët mund t’i drejtohen Inspektoratit të Shëndetit Publik, që dalin me një akt ekspertimi, nëse kasollja duhet të jetë aty. Gjobat për këto raste janë të konsiderueshme. Nëse standardet nuk plotësohen, shkohet deri në mbylljen forcërisht të stallës apo kasollës së derrit apo derrave.
