Policia e Lezhës ka parandaluar një ngjarje të mundshme kriminale në fshatin Dajç, duke arrestuar në flagrancë një 39-vjeçar që qarkullonte i armatosur me armë zjarri automatike dhe municion luftarak.
I arrestuari është identifikuar si Arben Leka, banues në Lezhë, i cili po lëvizte me një motomjet pa targa, i pajisur me armë automatike dhe fishekë, me dyshimin se mund të kryente një akt kriminal për shkak të një konflikti të mëparshëm.
Sipas njoftimit zyrtar të Policisë së Lezhës, pas marrjes së informacionit operativ, shërbimet e policisë ndërhynë me shpejtësi, lokalizuan motomjetin dhe neutralizuan 39-vjeçarin, i cili tentoi të largohej nga vendngjarja.
Gjatë kontrollit, në mjet u gjet një armë zjarri automatike me fishek në fole (gati për përdorim), një sasi municioni luftarak dhe vetë motomjeti rezultoi pa targa identifikuese.
Njoftimi i policisë:
Lezhë / Parandalohet një ngjarje e mundshme kriminale.
Finalizohet operacioni policor i koduar “Reagimi”.
Arrestohet në flagrancë 39-vjeçari që qarkullonte me motomjet pa targa, i armatosur me armë zjarri automatike me fishek në fole, gati për qitje.
Sekuestrohen arma e zjarrit, municion luftarak, si dhe motomjeti me të cilin qarkullonte i arrestuari.
Forca e Posaçme “Shqiponja”, në bashkëpunim me shërbimet e Komisariatit të Policisë Lezhë, pas marrjes së një informacioni në rrugë operative, se një shtetas i armatosur po lëvizte me motomjet në fshatin Dajç, me qëllim kryerjen e një ngjarjeje kriminale për shkak të një konflikti të mëparshëm, organizuan punën dhe ndërhynë menjëherë për neutralizimin e situatës.
Shërbimet e Policisë lokalizuan motomjetin pa targa ku drejtuesi i tij tentoi të largohej, por u neutralizua me profesionalizëm nga efektivët e Forcës së Posaçme “Shqiponja”.
Gjatë kontrollit të ushtruar në motomjet, u gjetën dhe u sekuestruan në cilësinë e provës materiale një armë zjarri automatike, me fishek në fole gati për qitje, një sasi municioni luftarak dhe motomjeti pa targa me të cilin lëvizte shtetasi.
Në përfundim të veprimeve procedurale, u bë arrestimi në flagrancë i shtetasit A. L., 39 vjeç, banues në Lezhë, për veprën penale “Mbajtja pa leje dhe prodhimi i armëve, armëve shpërthyese dhe i municionit”, parashikuar nga neni 278 i Kodit Penal.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme ligjore.
