Një ngjarje kriminale ka tronditur komunitetin e Rockville, Maryland, të hënën pasdite në 9 shkurt, kur një nxënës u qëllua me armë zjarri brenda një shkolle të mesme. Sipas policisë së Qarkut Montgomery, incidenti ndodhi në ambientet e shkollës së mesme Thomas S. Wootton High School, e cila ndodhet rreth 20 kilometra në veri të Uashingtonit, D.C.
Autoritetet njoftuan se një person është vënë në pranga në lidhje me ngjarjen. I dyshuari është gjithashtu nxënës i së njëjtës shkollë dhe u identifikua e u arrestua pak kohë pas të shtënave. Policia theksoi se në këtë fazë të hetimeve, nuk ka më rrezik për sigurinë publike.
Sipas Policisë së Qytetit Rockville, oficerët u njoftuan në vendngjarje rreth orës 14:15, pas raportimeve për të shtëna me armë zjarri brenda institucionit arsimor. Një nxënës u gjet i plagosur nga arma në korridor të shkollës dhe u dërgua menjëherë në spital. Fatmirësisht, gjendja e tij shëndetësore raportohet e qëndrueshme.
Pas incidentit, shkolla u vendos në bllokim të plotë (lockdown), ndërsa forca të shumta policie rrethuan zonën për të garantuar sigurinë e nxënësve dhe stafit. Prindërit u mblodhën jashtë ambienteve të shkollës, të shqetësuar dhe në pritje të informacionit për fëmijët e tyre.
Heather Rodriguez, nënë e një nxënëseje të klasës së nëntë në Wootton, tregoi se sapo mori vesh për të shtënat, hipi në makinë dhe u drejtua me shpejtësi drejt shkollës, e pushtuar nga paniku. Ajo qëndroi për disa orë jashtë institucionit arsimor, ndërsa komunikonte me vajzën e saj përmes mesazheve. Vajza i kishte shkruar se kishte dëgjuar të shtëna, se shkolla ishte mbyllur dhe se policia ishte kudo.
Ngjarja ka rihapur edhe një herë debatin për sigurinë në shkolla dhe dhunën me armë zjarri në Shtetet e Bashkuara.
/tvklan.al
