Erling Haaland ka një kontratë deri në vitin 2027, por te Manchester City e dinë se për lojtarë si ai, disa gjëra duhet të zgjidhen shumë më parë: në Angli flitet për rinovimin e tij, i konsideruar si një temë qendrore në klubin e drejtuar nga Pep Guardiola.
Sipas Daily Mirror, një propozim i parë do t’i kishte ardhur norvegjezit: 500.000 paund (600.000 euro) në javë, ose më shumë se 30 milionë euro në vit. Një shifër që do ta bënte atë lojtarin më të paguar në Premier League, madje duke kaluar edhe shokun e skuadrës Kevin de Bruyne.
Nëse Haaland do ta pranonte ofertën, dhe sipas Daily Mirror përgjigja do të ishte pozitive, ai do të nënshkruante me klubin anglez deri në sezonin 2028-2029. Kjo është dy sezone më shumë se kontrata që ai ka nënshkruar aktualisht.
Sigurisht, mediat angleze nxjerrin në pah një problem që duhet zgjidhur: klauzolën e lirimit të lojtarit, e cila për momentin shkon në 150 milionë paund (180 milionë euro). City dëshiron ta eliminojë atë, por agjentët e lojtarit duan ta mbajnë atë. Daily Mirror tregon një zgjidhje të mundshme të ndërmjetme: që klauzola e lirimit të rritet në 200 milionë paund (240 milionë euro).
