Është vetëdorëzuar në polici punonjësi i IMT së Tiranës, Klajdi Zhilla, i cili ishte shpallur në kërkim gjatë një operacioni të SPAK dhe Policisë, pasi mori ryshfet për të mos hequr tendën e një lokali.
Zhilla akuzohet për korrupsion pasiv dhe shpërdorim detyre, pasi dyshohet se ka marrë ryshfet për të mos ndërhyrë ndaj një tende të vendosur pa leje në një lokal në zonën e Kombinatit.
Kujtojmë se sipas raportimeve nga gazetarja Klodiana Lala, pas hekurave përfunduan edhe Gerald Fuçia dhe Edmond Çela, ndërsa u shpall në kërkim Klajdi Zhilla, i cili tashmë është dorëzuar, si dhe një tjetër.
Arrestimi i tyre mësohet se ka ndodhur në zonën e Kombinatit, në lokalin e ish-deputetit Mark Frroku, ku dhe u sekuestruan kamerat e sigurisë.
Policia e Shtetit:
Në vijim të operacionit policor të koduar “Hapësira publike”, specialistët e Sektorit për Hetimin e Korrupsionit në Drejtorinë për Hetimin e Krimeve Ekonomike dhe Financiare bënë ndalimin e shtetasit K. Zh., 35 vjeç, banues në Tiranë, inspektor i IMT, bashkia Tiranë, i cili u vetëdorëzua në Policinë e Tiranës.
Ky shtetas ishte i shpallur në kërkim, në kuadër të operacionit “Hapësira publike”, për veprat penale “Korrupsioni aktiv i personave që ushtrojnë funksione publike” dhe “Shpërdorimi i detyrës”, të kryera në bashkëpunim.
Materialet procedurale u referuan për veprime të mëtejshme në Prokurorinë e Posaçme kundër Korrupsionit dhe Krimit të Organizuar.
