Një 35-vjeçar shqiptar me rrezikshmëri të lartë shoqërore dhe që jetonte në arrati, u lokalizua dhe arrestua në Torino të Italisë.
Autoritetet shqiptare e kërkonin atë prej tre vitesh, sepse ndaj tij ishte lëshuar një urdhër paraburgimi për bashkëpunim në krimin e vrasjes dhe një urdhër ekzekutimi dënimi i lëshuar nga Gjykata e Tiranës për prodhim dhe mbajtje pa leje të armëve, për të cilat shtetasi shqiptar ishte dënuar me 3 vjet e 4 muaj.
Autoritetet italiane thanë se aksioni ishte si pjesë e projektit “Wanted”, të koordinuar nga Shërbimi Qendror i Operacioneve dhe me nxitjen e Shërbimit Qendror të Bashkëpunimit Policor.
“Ditët e fundit, oficerët e Skuadrës Fluturuese të Torinos ndaluan një burrë në komunën e Moncalieri. Gjatë një kontrolli, burri paraqiti një kartë identiteti elektronike spanjolle dhe një patentë shoferi. Oficerët, të dyshimtë për dokumentet, vendosën ta shoqëronin atë në selinë e policisë për hetime të mëtejshme”, njoftoi policia italiane.
Hetimet teknike të kryera nga Policia Ligjore konfirmuan se karta e identitetit dhe leja e drejtimit ishin tërësisht të falsifikuara.
Kontrollet e mëtejshme zbuluan se 35-vjeçari kishte marrë një “Njoftim të Kuq” nga autoritetet shqiptare për krime të rënda, duke përfshirë shoqatë kriminale, furnizim me mjete për të kryer vrasje dhe posedim të paligjshëm të armëve.
Për këto arsye, burri u arrestua për posedim të dokumenteve të falsifikuara të identifikimit të vlefshme për udhëtim jashtë vendit dhe u vu në arrest të përkohshëm në pritje të ekstradimit.
