Policia italiane ka sekuestruar një sasi droge prej 275 kg, ndërsa në pranga kanë rënë tre shtetas shqiptar. Mediat fqinje raportojnë se lënda narkotike është kapur në Rimini, ku 160 kg ishin hashash dhe 115 kg marijuanë.
Nga sa bëhet e ditur, shqiptarët e arrestuar janë perkatesisht të moshës 26, 39 dhe 35 vjeç, ndërsa emrat e tyre nuk bëhen ende të ditur. Ata janë kapur në momentet që po bënin shkëmbimin e lëndës narkotike, të cilën e kishin fshehur pas paletave të detergjentëve brenda një kamioni.
Hetuesit kanë thënë se droga ishte e destinuar për tregtarët e mëdhenj dhe nëse dilte në treg kapte vlerën e 700 mijë eurove.
Mbi pakot e marijuanës është gjetur i stampuar imazhi i Gokut, personazhi vizatimor i Dragon Ball. Dyshohet se kjo është një metodë e përdorur për të dhënë informacion të koduar në lidhje me marrësit e dërgesës së drogës.
