Në kuadër të hetimeve për çështjen e njohur si “Dosja 5D”, në Prokurori ka dhënë dëshminë e saj edhe shtetasja Pranvera Shahinasi, e cila ka deklaruar se ka qenë punonjëse në sektorin e financës në shoqërinë “Igor Elektrik” gjatë viteve 2016-2019.
Sipas dëshmisë, Shahinasi ka punuar si ekonomiste në kompani, fillimisht nën drejtimin e administratorit Eduart Meta, i cili më pas u zëvendësua nga Nestor Muhametllari. Ajo është shprehur se detyrat në punë ia caktonte drejtuesi dhe se ‘nuk ka mbajtur para cash apo përgjegjësi mbi arkën e shoqërisë’.
“Nuk mbaja para në zyrë dhe pjesën e arkës nuk e kisha unë. Dokumentet që mbanim ishin mandat-pagesa dhe firmoseshin nga administratori”, ka deklaruar ajo.
Për pyetjet mbi dokumentet me përshkrimin “honorar”, Shahinasi është shprehur se ‘nuk i kujtohet saktësisht, por mund të kenë qenë pagesa për shërbime të ndryshme’.
Ndër të tjera, dëshmitarja ka përmendur edhe emrin Mariglen Qato, për të cilin ka pohuar se e njeh si një person që ‘ka frekuentuar zyrat e shoqërisë dhe ka pasur kontakte me administratorin’. Ajo nuk ka pasur informacion nëse ai ishte ortak në shoqëri, duke sqaruar se sipas të dhënave të QKB-së, ortak figuronte vetëm Eduart Meta.
Një element tjetër i dëshmisë lidhet me përdorimin e adresës elektronike të kompanisë. Shahinasi ka deklaruar se në raste të caktuara, me kërkesë të administratorit, ka dërguar e-maile me dokumente financiare, përfshirë edhe një rast kur një listë përmbledhëse me informacion financiar i është dërguar Mariglen Qatos.
“Kur më thoshte administratori ‘dërgoja këtë informacion filan personit’, unë e bëja. Edhe mund të kem dërguar e-mail Qatos”, është shprehur ajo.
Prokuroria i ka vënë në dispozicion dëshmitares një dokument shkresor që përmban këtë komunikim elektronik si provë e përfshirjes së saj në dërgimin e të dhënave financiare.
Të pandehur në këtë dosje janë Redi Molla, Mariglen Qato dhe Taulant Tusha, si dhe Albano Janku, Enton Punavija, Julian Zanaj, Nestor Muhametllari. Qato e Molla akuzohen se kontrollonin në mënyrë të tërthortë kompaninë 5D dhe merrnin tendera nga Bashkia Tiranë.
