Kryetari i Komisionit të Posaçëm Antikorrupsion, Fatmir Xhafaj, ka dorëzuar në Kuvend dy dokumente bazë të punës së Komisionit të Posaçëm Antikorrupsion.
Në një komunikim me gazetarët pas dorëzimit të dokumenteve, Xhafaj theksoi rëndësinë e përfshirjes së opozitës në këtë proces dhe sqaroi disa prej shqetësimeve publike për mandatin e komisionit.
Xhafaj theksoi se ky Komision i Posaçëm e ka përmbushur qëllimin e ngritjes së tij ndonëse pati një mandat të kufizuar me vetëm 14 muaj dhe me periudhën elektorale në mes.
“Është detyrim që edhe mazhoranca dhe opozita të përfaqësohen në komisionet dhe nën komisionet e Kuvendit. Kështu që nuk shikoj asnjë arsye pse të mos jetë opozita e përfshirë në këtë proces. Pastaj ku merr pjesë opozita apo ku nuk merr pjesë është vendimmarrje e saj. Unë besoj se është në interes të opozitës që të përfshihet në këtë gjë. Unë nuk bej ftesë, sepse nuk e ngre unë. Komisionin e ngre Kuvendi dhe Kuvendi ka detyrimin që të përcaktojë vendet e opozitës dhe të mazhorancës. Nuk ka nevojë për të bërë ftesë. Është detyrim, pastaj ulen apo nuk ulen ata kjo është çështje tjetër”, u shpreh Xhafaj.
I pyetur nëse puna e komisionit cënon pavarësinë e sistemit gjyqësor, Xhafaj e hodhi poshtë kategorikisht këtë pretendim, duke e quajtur një “furtunë në gotë” dhe një debat të stisur për qëllime politike.
“Besoj se ajo që flet është puna dhe produktet i komisionit. Nëse gjeni në dy aktet që ka miratuar komisioni një mbivendosje apo përplasje me institucionet e drejtësisë, unë jam gati të dal publikisht dhe ta pranoj këtë gjë. E gjitha kjo ishte një furtunë në gotë e ngritur me një qëllim të caktuar. Ka 700 faqe dokumenti analitik, është ky plan kombëtar veprimi dhe më më gjeni një të vetme që ka lidhje me drejtësinë. Por kështu ndodh në këtë vend kur flasin dhe nuk dëgjojnë”, tha ndër të tjera Xhafaj.
