Një shtetase ruse dhe një ukrainase janë arrestuar nga Policia e Tiranës pasi shërbenin në rolin e tutorëve dhe shfrytëzonin vajza të huaja për prostitucion, ndërsa 11 persona të tjerë janë proceduar në gjendje të lirë.
Në pranga kanë rënë shtetasja ukrainase Anna Tkachenko, 27 vjeçe dhe shtetasja ruse Elena Maslova, 37 vjeçe, të dyja banuese në Tiranë.
Këto të dyja janë kapur në flagrancë në rrugën “Naim Frashëri” të kryeqytetit, teksa po merrnin shuma parash nga shtetase të huaja, të cilat i shfrytëzonin për prostitucion.
Nga verifikimet e bëra të uniformave blu, sqarohet se vajzat i reklamonin në faqen “Escort Tirana”, e paratë e mbledhura prej tyre ua transferonin organizatorëve të kësaj faqeje, të cilët ende nuk janë identifikuar.
11 vajzat të cilat janë proceduar penalisht akuzohen për ushtrim prostitucioni.
Nga ana tjetër, shtetasja ruse dhe ukrainase akuzohen për veprat penale “Prostitucioni”, “Shfrytëzimi i prostitucionit” dhe “Mbajtja e ambienteve për prostitucion”,
NJOFTIM
Finalizohet nga Seksioni për Hetimin e Trafiqeve të Paligjshme në DVP Tiranë, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, operacioni policor i koduar “Escort”, pas një hetimi të kryer me metoda speciale.
Arrestohen në flagrancë një shtetase ruse dhe një shtetase ukrainase, të cilat shfrytëzonin për prostitucion, shtetase të huaja të reklamuara në faqen “Escort Tirana”, dhe më pas shumat e parave të përfituara nga kjo veprimtari e paligjshme, ia transferonin organizatorëve të kësaj faqeje.
Procedohen penalisht 11 shtetase, për ushtrim prostitucioni.
Sekuestrohen shuma parash, të dyshuara të përfituara nga kjo veprimtari e paligjshme.
Specialistët e Seksionit për Hetimin e Trafiqeve të Paligjshme, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, në vijim të operacioneve të njëpasnjëshme për goditjen e paligjshmërive në fushën e ushtrimit dhe shfrytëzimit të prostitucionit, kanë regjistruar një procedim penal të vitit 2023 dhe kanë organizuar dhe finalizuar operacionin policor të koduar “Escort”.
Në kuadër të këtij operacioni u arrestuan në flagrancë shtetasja ukrainase Anna Tkachenko, 27 vjeçe, dhe shtetasja ruse E. M., 37 vjeçe, të dyja banuese në Tiranë, për veprat penale “Prostitucioni”, “Shfrytëzimi i prostiucionit” dhe “Mbajtja e ambienteve për prostitucion”.
Këto dy shtetase janë kapur në flagrancë në rrugën “Naim Frashëri”, duke marrë shuma parash, nga shtetase të huaja, të cilat dyshohet se i shfrytëzonin për prostitucion.
Gjatë verifikimeve të kryera ka rezultuar se këto shtetase mblidhnin shumat e parave të përfituara nga shtetaset e huaja që dyshohet se i shfrytëzonin për prostitucion, të cilat reklamoheshin në faqen “Escort Tirana”, dhe më pas këto shuma parash ia transferonin organizatorëve të kësaj faqeje, shtetas ende të paidentifikuar.
Në vijim të veprimeve nisi procedimi penal për 11 shtetase të huaja, për ushtrim prostitucioni.
Më parë, gjatë hetimeve të kryera në kuadër të këtij procedimi penal, është finalizuar operacioni policor i koduar “Foreing”.
Materialet i kaluan Prokurorisë.
