Është bërë i mundur ekstradimi nga Greqia drejt Shqipërisë të një shtetasi të dënuar për “trafikim të miturve”, i cili ishte i shpallur në kërkim ndërkombëtar.
Bëhet fjalë për shtetasin Kujtim Demiri, i cili është arrestuar në Greqi ditën e djeshme (20 gusht).
Demiri ka marrë nga Shqipëria në Greqi një fëmijë të mitur dhe e ka shfrytëzuar për të lypur në shtetin fqinj nën ushtrimin e dhunës.
Për këtë, Gjykata e Krimeve të Rënda e ka dënuar Kujtim Demirin me 15 vite heqje lirie, vendim ky i marrë më 1 shkurt 2010.
Ai akuzohet për veprën penale “Trafikimi i të miturve”, parashikuar nga neni 128/b/2 i Kodit Penal të Republikës së Shqipërisë.
Arrestimi dhe ekstradimi i tij u bë përmes bashkëpunimit të Interpol Tirana dhe Interpol Athina.
NJOFTIM
Bashkëpunimi midis Interpol Tirana dhe Interpol Athina mundëson arrestimin dhe ekstradimin e një të kërkuari nga Greqia në Shqipëri
Më datë 20.08.2024, pas një bashkëpunimi intensiv dhe shkëmbimi informacioni mes Interpol Tirana dhe Interpol Athina u realizua arrestimi dhe ekstradimi nga Greqia i shtetasit Kujtim Demiri.
Ky shtetas ishte shpallur në kërkim ndërkombëtar nga Interpol Tirana më datë 06.01.2018, pasi Gjykata e Shkallës së Parë për Krimet e Rënda, me vendimin e datës 01.02.2010, e ka dënuar me 15 vjet burg, për veprën penale “Trafikikimi të miturve”, parashikuar nga neni 128/b/2 , i Kodit Penal.
Sipas vendimit, shtetasi Kujtim Demiri ka marrë nga Shqipëria në Greqi fëmijën e mitur H.S dhe e ka shfrytëzuar për të lypur në Greqi nën ushtrimin e dhunës.
Policia e Shtetit dhe Interpol Tirana vazhdojnë angazhimin për sjelljen në Shqipëri dhe vendosjen para drejtësisë të personave në kërkim ndërkombëtar.
