Të tjera detaje janë bërë publike në lidhje me sekuestrimin e pasurive me vlerë 26 milionë euro të Kristian Konit, person me 5 emra dhe që rezulton i përfshirë në organizata kriminale e trafik droge.
Sipas gazetares Klodiana Lala, bëhet e ditur se autoritetet hetimore po ndjekin me vëmendje një transaksion të dyshimtë për pasuri të paluajtshme në zonën elitare të Mulletit, ku rezulton i përfshirë shtetasi Kristian Koni, një emër i njohur për organet ligjzbatuese si i përfshirë në veprimtari kriminale.
Bëhet fjalë për Vilën nr. 2-B, me sipërfaqe ndërtimi 391.1 m², pjesë e kompleksit rezidencial nw periferi tw Tiranws, e pajisur me pishinë dhe 3 kate banimi. Pasuria në fjalë ka kaluar përmes një kontrate premtim-shitjeje mes shtetasve Vesel dhe Rezarta Demiraj (në cilësinë e shitësve) dhe shoqërisë “Kriol.Al” sh.p.k., e përfaqësuar nga Kristian Koni.
Kjo vilë, e porositur fillimisht nga Vesel Demiraj me një kontratë ndërtimi me çmim 808,000 euro, është rishitur me vonë për vetëm 300,000 euro, një diferencë që ka ngritur dyshime të forta për pastrim parash dhe përfshirje në veprime fiktive.
Kush është Vesel Demiraj?
Vesel Demiraj është babai i dy të rinjve që pak kohë më parë u qëlluan me armë zjarri në zonën e Lundrës, një ngjarje që tronditi opinionin publik dhe për të cilën hetimet janë ende në vijim. Nuk dihet nëse kjo po hetohet si pistë nga autoritetet, pasi deri me tani policia thote se shenjestra u ngatërrua.
Kristian Koni, me shumë identitete dhe lidhje kriminale
Kristian Koni rezulton i përfshirë në një organizatë kriminale të trafikut të drogës, si dhe njihet nga autoritetet me pesë identitete të ndryshme.
Aktualisht, ai figuron si administrator i shoqërisë “Kriol.Al” sh.p.k., e përfshirë drejtpërdrejt në transaksionin për vilën ne periferi te Tiranes. Strukturat hetimore po analizojnë burimin e fondeve të përdorura nga kjo kompani dhe lidhjet e saj të mundshme me rrjete kriminale.
Njoftimi i policisë dje (28 gusht)
Tiranë
Finalizohet operacioni policor i koduar “Fortesa”.
Sekuestrohen pasuri me vlerë 26 milionë e 500 mijë euro, në pronësi të një 45-vjeçari, i dënuar për vrasje dhe për pjesëmarrje në grup kriminal për trafikim të lëndëve narkotike, nga autoritetet italiane.
Specialistët e Seksionit për Hetimin e Pastrimit të Parave, në bashkëpunim me specialistët e Agjencisë së Administrimit të Pasurive të Sekuestruara dhe të Konfiskuara, në kuadër të një procedimi penal të drejtuar nga Prokuroria e Tiranës, ekzekutuan vendimin e Gjykatës së Tiranës, për sekuestrimin e pasurive në pronësi të shtetasit K. K., alias O. M., 45 vjeç, i dënuar më parë për veprat penale “Vrasja me paramendim” dhe “Trafikimi i lëndëve narkotike”, kryer në kuadër të grupit të strukturuar kriminal.
Pasuritë e sekuestruara janë konkretisht: 19 prona, 2 automjete dhe 20 llogari bankare, të regjistruara në emër të 45-vjeçarit ose të familjarëve të tij, me vlerë tregu rreth 26 milionë e 500 mijë euro.
Vijon puna për gjurmimin dhe sekuestrimin e pasurive të tjera që dyshohet se kanë burim nga veprimtaritë kriminale të këtij shtetasi.
Materialet procedurale iu referuan Prokurorisë së Tiranës, për veprime të mëtejshme.
