Policia ka vënë në pranga një 47-vjeçare me dy identitete, e shpallur në kërkim ndërkombëtar nga autoritetet italiane. Majlinda Avduli, e njohur edhe me emrin Dajana Tafani, u arrestua në Elbasan me qëllim ekstradimin drejt Italisë.
Sipas njoftimit zyrtar, 47-vjeçarja ishte shpallur në kërkim ndërkombëtar nga Interpol Roma, pasi Gjykata e Apelit e Kaliarit e ka dënuar me 9 vjet, 6 muaj e 22 ditë burgim. Ajo akuzohet për veprën penale “Trafikimi i narkotikëve”, kryer në kuadër të një organizate kriminale, sipas një vendimi të vitit 2016.
Procedurat për ekstradimin e saj drejt shtetit fqinj pritet të vijojnë në ditët në vijim.
Njoftimi i policisë:
Drejtoria e Forcës së Posaçme Operacionale finalizoi operacionin e radhës për kapjen e shtetasve në kërkim ndërkombëtar.
“Operacionalja 44”/E dënuar me mbi 9 vjet burgim, si pjesëtare e një organizate kriminale që trafikonte lëndë narkotike, kapet në Elbasan, 47-vjeçarja.
Si rezultat i koordinimit të punës dhe shkëmbimit të informacioneve, me partnerët italianë, nëpërmjet strukturave homologe Interpol Tirana dhe Interpol Roma, shërbimet e Drejtorisë së Forcës së Posaçme Operacionale, në kuadër të operacionit “Operacionalja 44”, lokalizuan në Elbasan, kapën dhe vunë në pranga, me qëllim ekstradimin në Itali, shtetasen:
Majlinda Avduli alias Dajana Tafani, 47 vjeçe, banuese ne Elbasan.
Kjo shtetase ishte shpallur në kërkim ndërkombëtar nga Interpol Roma, pasi Gjykata e Apelit e Kaliarit, Itali, në vitin 2016, e ka dënuar me 9 vjet, 6 muaj e 22 ditë burgim, për veprën penale “Trafikimi i narkotikëve”, kryer në kuadër të organizatës kriminale.
Interpol Tirana po bashkëpunon me homologët në Romë, për të finalizuar ekstradimin e kësaj shtetaseje, në Itali.
