Vrasja e gjyqtarit të Apelit Astrit Kalaja, ngjarje e cila ka tronditur mbarë opinionin shoqëror, ishin tema e emisionit “Në Shënjestër” këtë të martë në News24, me autore Klodiana Lala.
Nga pamjet e kamerave në sallën e gjyqit, para se Elvis Shkambi të qëllonte mbi gjyqtarin, ndaj tij dhe xhaxhait Gjon Shkambi u zhvillua një dialog.
“Në Shënjestër” ka zbardhur fjalët e fundit mes tyre që pasuan me 3 plumba që i morën jetën menjëherë gjyqtarit Kalaja.
Gjithçka ndodhi pas dhënies së vendimit, ku i pari që u çua në këmbë ishte gjyqtari i çështjes Astrit Kalaja. Dhe pas tij u çuan njëkohësisht dhe palët në proces. Në njërën anë Gjon Shkambi dhe nipi i tij Elvis Shkambi.
Dhe përballë tyre, pala kundërshtare Ragip Kurtaj dhe djali i tij Ervisi. Një proces i gjatë dhe i lodhshëm që kishte mbërritur në dyert e Gjykatës së Apelit të Juridiksionit të Përgjithshëm me mjaftueshëm ecejake që kishin përshkuar një kalvar të mundimshëm gjyqesh prej afro 2 dekadash.
Me siguri ndoshta ndër gjykimet më të gjata që lidhet një pronë që mund të ketë parë historia e një republike në historinë moderne të saj. Por edhe me fundin më tragjik dhe të pamendueshëm. Ishte ora 15.35 e datës 6 Tetor.
Jashtë gjykatës së Apelit, ende kishte lëvizje të shumta. Si një ditë e hënë, e parë e javës, mjaftueshëm e ngarkuar, ku të gjithë me ç’prisnin të nxitonin dhe të mbyllnin hesapet me drejtësinë. Ata që këtë ditë kishin një seancë, apo ata që ishin aty për të mësuar se kur do të ishte radha e tyre për të marrë drejtësi.
Dikush për të marrë një lajm të mirë dhe dikush për t’u kthyer zemër thyer nga një vendim që mund ta linte të pakënaqur. Ashtu siç është në të vërtetë një vendim drejtësie.
Që në fund nuk kënaq çdo palë që është në proces. Një mendim që duket se e kishte bluajtur me veten edhe Elvis Shkambi.
Por që duket se ndryshe nga të ngjashmit e tij në procese të tilla që të lodhin dhe të raskapisin, që kishin zgjedhur të ndiqnin rrugën e ligjit, vendosi të kryente aktin e tmerrshëm të vrasjes së një gjyqtari të Republikës.
Plumba, zhurma e të cilëve buçiti nga salla numër 3 ku po mbahej seanca dhe shpejt u shpërndanë në të gjithë koridorët e Gjykatës. Duke frikësuar çdo të pranishëm, që në atë moment e kishte të vështirë të kuptonte se çfarë po ndodhte.
Por që shpejt ajo që u mësua do të kthehej në një nga ngjarjet më të rënda të ndodhura brenda një gjykate në Shqipëri. Vrasja e një gjyqtari teksa sapo kishte dhënë vendimin e tij mbi një çështje civile.
Gjyqtari Astrit Kalaja, me një përvojë prej disa dekadash në drejtësi, që u qëllua me tri plumba në gjoks. Vrasësi i gjyqtarit Kalaja që do të vetëprezantohej si Elvis Shkambi. 30-vjeçari që shikoni në këto pamje.
Gjatë momentit kur ndërsa forcat e shumta të policisë kishin mbërritur në ambientet e Gjykatës së Apelit, pas alarmit për të shtëna, i pret i qetë në oborrin e përparmë të godinës. Me të njëjtën qetësi me të cilën ai i fton ta arrestojnë, duke u treguar se ai është vrasësi.
Ndërkohë që brenda ambienteve të sallës së gjyqit ai kishte ngritur armën dhe ndaj palës kundërshtare në proces, duke lënë të plagosur babë e bir, Ragip dhe Ervis Kurtaj. Të cilët vetëm një fat i ndryshëm nga ai i gjykatësit u kurseu jetën.
Armë e cila u drejtua edhe ndaj sekretares së seancës, por që kjo e fundit mundi të largohet në kohë.
“Më datë 6 Tetor 2025 së bashku me babain tim kemi mbërritur në Gjykatën e Apelit Tiranë, në lidhje me një pronë, e cila është në qytetin e Shkodrës/ Pronë-pallat ku ka shumë banorë që janë në proces gjyqësor prej vitesh me shtetasin Gjon Shkambi, i cili nga ana e tij pretendon se është pronë e tij.
Bashkë me babain tim Ragipin kemi qëndruar në hollin e gjykatës duke pritur fillimin e séancës, dhe në holl gjetëm dhe shtetasin Gjon Shkambi, si dhe një djalë i moshës 35-40 vjeç i cili e ka shoqëruar në mënyrë të vazhdueshme në këtë proces. Në dijeninë time ky person jetonte në qytetin e Shkodrës.”, ka rrëfyer para trupit gjykues dëshmitari në vendngjarje, pala kundërshtare në këtë proces Ervis Kurtaj
Ervis Kurtaj dhe babai i tij Ragipi të papërgatitur për atë çfarë ndodhi, sapo u shpall vendimi, bënë të largoheshin nga salla.
Kjo për t’i shpëtuar plumbave që fillimisht shënjestruan gjyqtarin Astrit Kalaja i cili u qëllua egërsisht në gjoks nga një distancë shumë e afërt ndërsa ndodhej në këmbë në poltronin e tij të zi të gjykatësit.
Kalaja bëri vetëm disa hapa dhe u plandos në tokë, ndërsa Ervis dhe Ragip Kurtaj edhe pse përfituan nga momenti, nuk shkuan shumë gjatë. Pasi ata u arritën nga Elvis Shkambi vetëm disa metra më tutje.
Ervis Kurtaj tregon akuzat që Gjon Shkambi hodhi ndaj gjyqtarit teksa ai po lexonte vendimin.
Përgjigja që Astrit Kalaja i dha dhe më pas ngjarjen e tmerrshme që ndodhi në vetëm pak sekonda.
“Gjyqtari lexoi vendimin pasi ishte seanca e fundit. Vendimi ishte në favorin tonë, pasi la në fuqi vendimin e Gjykatës së Shkodrës. Në këtë moment, pala tjetër nuk ishte dakort me vendimin e dhënë.
Në atë moment Gjon Shkambi u ngrit në këmbë dhe iu drejtua gjyqtarit me fjalët: “Po vërtetoj ato që ka thënë e gjithë Shkodra për ty që ti je….”. Gjyqtari ju drejtua duke i thënë ‘vazhdo t’i vazhdo”, ka thënë para hetuesve Ervis Kurtaj.
Në momentin që po largohej personi që shoqëronte shtetasin Gjon Shkambi ka nxjerrë nga brezi një pistoletë dhe ka qëlluar në drejtim të gjyqtarit Astrit Kalaja.
Po brenda sallës ku u mbajt seanca, ku u dha vendimi që ishte në disfavor të familjes së tij, Elvis Shkambi po kaq qetësisht u kthye dhe qëlloi mbi babë e bir të cilët ashtu të plagosur siç ishin, në krah të njëri-tjetrit ia dolën të linin ambientet e brendshme të gjykatës.
Gjurmë gjaku që i lanë edhe në detektorin që duhet të shërbente për të siguruar jetën e tyre, por që një anomali që deri në këtë moment ishte e pasqaruar, kishte bërë që Elvis Shkambi të depërtonte deri në sallën ku do të mbahej seanca gjyqësore, me një pistoletë me vete”, vijon të ketë thënë para gjykatësve Ervis Kurtaj.
Ai vijon në dëshminë e tij të tregojë se në këtë moment mori babain për t’u larguar në drejtim të koridorit, me qëllim për tju shmangur kësaj situate.
Personi pasi qëlloi mbi gjyqtarin nisi të qëllojë dhe ndaj tyre. Si pasojë e të shtënave të dy mbetën të plagosur.
“Unë mora dy plumba në krahun e djathtë, ndërsa babai mori një dëmtim me plumb në pjesën e mesit në krahun e majtë. Për shkak se isha në gjendje të traumatizuar nuk mund ta shikoj se në cilën anë u largua autori”, tha Kurtaj.
Ervis Kurtaj iu rrëfeu hetuesve edhe një detaj interesant, që ngriti dyshime të forta mbi Gjon Shkambin si bashkëpunëtor në vrasjen e gjyqtarit Astrit Kalaja në rolin e nxitësit.
Ai kujton se Gjon Shkambi iu tha punonjësve të sigurisë se ta ndalonin se ai ishte i dyshuari për ngjarjen.
Pas nesh ishte shtetasi Gjon Shkambi dhe teksa po dilnin nga gjykata i tha policit të shërbimit te gjykata ta ndalonte pasi ai ishte si person i dyshuar në këtë ngjarje. Ai e ndaloi dhe e futi në ambjentet e brendshme të gjykatës.
Askush se di me siguri nëse Gjon Shkambi e bëri këtë veprim që nipi i tij, Elvisi të kishte mundësinë të arratisej dhe ti shpëtonte policisë.
Ervis Kurtaj, siç shikohet edhe në pamje, e priti i plagosur në rrugë ambulancën.
Ndërsa i pari që u transportua me urgjencë drejt spitalit të Traumës, për të marrë ndihmën mjekësore ishte gjyqtari Kalaja.
Zhvillime të cilat ndodhnin pikërisht përpara syve të vrasësit.
I cili ndërsa barela me trupin e gjyqtarit Kalaja, e rrethuar nga efektivë të shumtë të forcave ‘Shqiponja’, po linte ambientet e Gjykatës dhe po i drejtohej autoambulancës, që e priste në dalje në rrugën kryesore, vazhdonte të sodiste i qetë brenda oborrit të gjithë zallamahinë që kishte shkaktuar.
Gjyqtari Kalaja që vetëm pak minuta pas lajmit që ishte qëlluar, u mësua se kishte ndërruar jetë.
Duke mos i shpëtuar dot kështu plumbave që kishte marrë.
Më datë 6 Tetor 2025, rreth orës 15:38, salla operative e Drejtorisë Vendore të Policisë Tiranë, ka marrë njoftim se në ambientet e brendshme të Gjykatës së Apelit të Juridiksionit të Përgjithshëm Tiranë është qëlluar me armë zjarri gjyqtari Astrit Kalaja, i cili po zhvillonte seancë gjyqësore me objekt ‘Kundërshtimin e veprimeve përmbarimore’, me palë paditëse shtetasin Ragip Kurtaj i shoqëruar nga djali i tij Ervis Kurtaj si dhe palë të paditur përmbaruesi gjyqësor T. M., Zyra Përmbarimore Shkodër, dhe palë të treta shtetasin Gjon Shkambi, i shoqëruar nga nipi i tij Elvis Shkambi.
Elvis Shkambi dhe xhaxhai i tij të cilët kishin udhëtuar nga Shkodra në të njëjtën ditë, me të njëjtin automjet dhe kishin mbërritur në Gjykatën e Apelit, dy orë përpara se të mbahej seanca ku ata ishin palë e paditur.
Pamjet e kamerave të sigurisë të territorit të jashtëm dhe atij brenda gjykatës, të cilat në orën 13.42 minuta të mesditës së datës 6 Tetor fokusojnë xhaxha dhe nip, teksa kalojnë të pashqetësuar detektorin metalidentifikues që ndodhet në hyrjen kryesore të Gjykatës.
Detektor i cili lëshon sinjalin e kuq bashkëshoqëruar me alarmin, se personat që sapo kanë kaluar, mbajnë me vete sende të palejueshme.
Por që në vend që roja i sigurisë, të respektojë protokollin e sigurisë dhe t’i kthejë pas për një kontroll të dytë, ai tregohet neglizhent duke lejuar dy personat me probleme në aksesin e tyre në detektor, të vazhdojnë rrugën më tej.
Banush Koxhaj, 63 vjeç,i cili është sot një nga të ndaluarit në lidhje me hetimet e nisura mbi mekanizmin e vrasjes së gjyqtarit Kalaja.
I cili ndërsa u mor në pyetje nga grupi hetues, u shpreh në lidhje me mungesën e vigjilencës së tij, se atë ditë ai kishte qenë sëmurë, pasi vuan nga diabeti.
Dhe se për këtë arsye kishte njoftuar edhe kancelaren e gjykatës, për ta zëvendësur. Por kjo gjë nuk kishte ndodhur.
Dhe në këto kushte jo të mira shëndetësore, ai kishte vazhduar të kryejë detyrën.
“Vuaj nga diabeti. Ditën e ngjarjes kam qenë sëmurë dhe kam kërkuar leje. Kur palët kaluat në skaner nuk kam qenë në gjendje të mirë shëndetësore. Kam lajmëruar dhe kancelaren se nuk ndihesha mirë. Një orë më vonë, ajo më ka dhënë leje për t’u larguar, por nuk jam zëvendësuar’, është shprehur Banush Koxhaj para hetuesve.
Do të ishte pikërisht ky momenti fatal që i hapi dhe rrugën e fundit të mbetur një vrasje, e cila nuk do të vonojë.
