Dallëndyshe Bici është larguar nga posti i kryeinspektores së Inspektoratit Kombëtar të Mbrojtjes së Territorit, bëjnë të ditur burime për Panorama Online.
Bici mbante këtë post prej 18 muajsh, kur u emërua në muajin korrik të 2024.
Nuk dihen ende arsyet e kësaj lëvizje në drejtimin e IKMT-së.
Ndërkohë, në vendin e Dallëndyshe Bicit në krye të IKMT-së do të jetë Adriatik Kupi, edhe ky një person pranë qeverisë, pasi ka mbajtur disa funksione. Fillimisht ka qenë administrator i Njësisë Administrative Petrelë në Tiranë dhe më vonë drejtor i Operatorit të Sistemit të Shpërndarjes.
Kupi po ashtu është një njëri i afërt edhe me zv ministrin e Brendshëm aktual, Xhemal Qefalia.
Dallëndyshe Bici e denoncuar nga Berisha
Dallëndyshe Bici është denoncuar më parë nga kreu i PD-së, Sali Berisha për lidhjet e saj me trafikantë narkotikësh.
Sipas denoncimit të Berishës disa vite më parë, drejtoresha e IKMT-së ka pasion trafikantët duke i bërë pjesë të administratës.
“Bici e partisë ka pasion për trafikantët. Ajo i punëson ata me zell të madh! Lexoni denoncimin dhe shikoni foton e qytetarit dixhital. ‘Përshëndetje Doktor. Po ju përcjell një informacion. Personi që po ju çoj në foto dhe që është realisht nr.2, njeriu më i afërt dhe i besuar i D.Bicit të IKMT quhet Vilson Lalaj dhe është nga Kuçi i Vlorës. Ky shtetas gjatë kohës që ka qenë i punësuar në Komunën Hor Vranisht është arrestuar nga Prokuroria e Vlorës dhe konkretisht nga prokurori Dorian Tafili për trafikim narkotikësh. Ka bërë disa vite burg rreth viteve 2005 ose ndoshta pak më mbrapa. Është informacion 100% i saktë’”, thuhet në mesazhin e publikuar nga z. Berisha. Edhe më herët, kreu demokrat ka dënuar ashpër shembjet antiligjore te IKMT në ambientet e “Prestige Resort”. Ai akuzoi Kryeministrin Edi Rama se mban përgjegjësi penale “për shkatërrimin antiligjor të pronës së tjetrit”, pasi Rama e ka firmosur vetë lejen për ndërtimin e resortit si kryetari i KKT.
“Edi Rama ka urdhëruar shkatërrimin e pjesës së resortit në kundërshtim flagrant me ligjin. Sipas zëvendëses së kësaj kompanie, gjithçka është ndërtuar mbi bazën e lejeve të firmosura nga vetë Rama, çka e bën përgjegjës penalisht atë për shkatërrimin antiligjor të pronës së tjetrit. Ndërmarrja, qoftë dhe në zbatim të ligjit të një akti të tillë kur resorti është plot me turistë, është akt i mirëfilltë banditeskt. Goditje që i jepet këtij sektori, shembulli më i keq dhe diskreditues për Shqipërinë. Ajo që unë dënoj me forcën më të madhe e nuk mund të pajtohem, sfondi politik i këtyre veprimeve. Janë të dënueshme, antikushtetuese përpjekjet për të shkatërruar një grup mediatik në kundërshtim me ligjet e vendit”, denonconte Sali Berisha në 2022.
Adriatik Kupi i denoncuar nga PD
Edhe Adriatik Kupi është denoncuar më parë nga Partia Demokratike, kur ka mbajtur postin drejtues në OSHEE. Sipas denoncimit të PD, Kupi ka blerë vota në zgjedhjet e 14 majit 2023. Në atë kohë Partia Demokratike ka kërkuar nga SPAK që të hetojë Adriatik Kupin.
“Adriatik Kupi është Drejtor i Drejtorisë së Tensionit të Lartë në OSSH. Ai është gjithashtu Kryetari i Partisë Socialiste për zonën IBËS, BËRZHITËS, PETRELËS dhe FARKËS.
Në disa raste të mëparshme Partia Demokratike, ka denoncuar Adriatik Kupin për shkelje të dispozitave ligjore të paracaktuara nga Kodi Zgjedhor. Detajet e këtij denoncimi janë pjesë e Librit të Zi të Zgjedhjeve: Farsa Elektorale e 14 majit 2023.
Përveҫ sa më lart, në adresën tonë, ka mbërritur denoncime lidhur me Adriatik Kupin, në cilësinë e Titullarit të Drejtorisë së Tensionit të Lartë pranë OSSH sh.a.
Ankuesit ngrenë shqetësimin se Adriatik Kupi pas përfundimit të zgjedhjeve të 14 Majit ka prokuruar miliona euro fonde publike në kuadër të rikuperimit të parave të përdorura për blerjen e votave”, thuhet ne denoncimin e PD të 3 viteve më parë.
