Bilanci i viktimave në ishullin Sumatra të Indonezisë është rritur në mënyrë dramatike në 442, sipas autoriteteve vendase, ndërsa përmbytjet dhe rrëshqitjet e dheut vijojnë të godasin rajonin.
Më herët gjatë së dielës numri i të vdekurve kishte kaluar 300, por kushtet ekstreme të motit dhe ndërprerjet e rrugëve kanë vështirësuar përpjekjet e ekipit të shpëtimit.
Stinët e musoneve, të forcuara këtë vit nga stuhitë tropikale, kanë sjellë përmbytje nga më të rëndat në dekada në Azinë Juglindore. Përveç Indonezisë, situata është dramatike edhe në Malajzi, Tajlandë dhe Sri Lanka, ku raportohen qindra viktima, persona të zhdukur dhe miliona të prekur.
Në Tajlandë, numri zyrtar i viktimave ka mbërritur në 170, ndërsa dy jetë të humbura janë konfirmuar në shtetin verior Perlis të Malajzisë. Edhe Sri Lanka po përballet me pasoja të rënda nga reshjet ekstreme, ku thuhet se kanë humbur jetën afro 160 persona.
Në Indonezi, Cikloni i rrallë tropikal “Senyar” ka shkaktuar shkatërrim masiv, me mijëra banesa të zhytura dhe zona të tëra të shkatërruara nga rrëshqitjet e dheut. Dëshmitë e banorëve tregojnë dimensionin e vërtetë të katastrofës.
“Rryma ishte shumë e shpejtë, brenda pak sekondash arriti në rrugë, hyri në shtëpi”, tha për BBC-në Arini Amalia, nga provinca Aceh. Ajo tregoi se bashkë me gjyshen u detyruan të vraponin drejt një shtëpie në një zonë më të lartë. Kur u kthyen të nesërmen, shtëpia e tyre kishte humbur nën ujë: “Është fundosur tashmë.”
