Më 2 dhjetor do të zhvillohet ceremonia mortore për Ipeshkvin e Dioqezës së Sapës, Monsinjor Simon Kulli, i cili u nda nga jeta në moshën 52-vjeçare.
Sipas njoftimit zyrtar, trupi i tij do të prehet në kriptën e Katedrales “Nënë Tereza” në Vaun e Dejës, vend ku ai shërbeu për vite me radhë si famullitar, duke u bërë një figurë e dashur dhe e respektuar për komunitetin lokal.
Arqidioqeza Metropolitane Tiranë-Durrës u ka bërë thirrje të gjithë besimtarëve katolikë të marrin pjesë në tre ditë meshash të organizuara në nderim të Monsinjor Kullit, si një homazh për jetën dhe veprimtarinë e tij në shërbim të Kishës dhe komunitetit.
Dyshohet se ai ka pësuar një goditje nga hipertensioni në mënyrë të papritur, duke pasuar kështu në vdekjen e tij.
Simon Kulli u emërua si administrator i dioqezës së Sapës në Vaun e Dejës në vitin 2016. Një vit më pas, ai u emërua në këtë dioqezë Ipeshkëv, duke zëvendësuar në detyrë Imzot Luçiano Avgustinin.
Kush ishte Simon Kulli
Mons. Simon Kulli, ka lindur me 14 shkurt 1973 në fshatin Pistull të rrethit të Shkodrës. U pagëzua nga Motër Maria Kaleta në vitin e parë të lindjes së tij, 1973. Shkollën fillore dhe të mesme i kreu në vendlindje.
Me 2 shkurt 1992 është pranuar në Seminarin Ndërdioqezan Shqiptar “Zoja e Këshillit të Mirë” në Shkodër, ku kreu dy vite parapërgatitje për fillimin e studimeve filozofike e Teologjike.
Në vitin 1994 fillon studimet e Filozofisë.
Shugurohet diakon me 14 shtator të vitit 1999, në Katedralen e Shkodrës nga Arqipeshkvi i Shkodër Imzot Angelo Massafra. Përvoja e tij baritore në periudhën e Diakonatit ishte e ndarë në dy realitete: gjashtë muaj shërbeu në famullinë e “Shën Shtjefnit” në Shkodër, me famullitar Mons. Luçiano Avgustinin, dhe katër muaj të tjerë shërbeu në famullinë “Zoja Rruzare” në Dajç të Zadrimës (Lezhë), nën kujdesin e famullitarit dom Injac Dema.
Në vitin Jubilar 2000, me 29 qershor, përmes shtrirjes së duarve të Arqipeshkëvit të Shkodrës, Imzot Angelo Massafra, shugurohet meshtar në Katedralen e Shkodrës së bashku edhe me katër meshtarë të tjerë shqiptarë. Këta qenë shugurimet e para meshtarake pas periudhës së egër të regjimit komunist në Shqipëri.
Pas shugurimit meshtarak, emërohet Sekretar dhe Kancelar i Dioqezës së Sapës, me ipeshkëv Imzot Dodë Gjergjin, dhe njëkohësisht ndihmës famullitar në Dajç të Zadrimës (2000-2004).
Nga viti 2004 e deri në vitin 2007, me dekret të Ipeshkvit Mons. Dodë Gjergji, emërohet Famullitar i Katedrales e Lumja Nënë Tereza, në famullinë e “Shën Nikollit” në Vau-Dejës. Në të njëjtën periudhë mbuloi edhe detyrat si Ekonom i Dioqezës dhe Drejtor i Caritas-it Dioqezan SAPA.
Në vitin 2007, me ardhjen e Ipeshkvit të ri, Imzot Luçiano Avgustinit, riemërohet po me të njëjtat detyra të mëparshme në Dioqezë si: Kancelar, Famullitar i Katedrales Ekonom dhe Drejtor i Caritas-it.
Në 2012 pas ndërtimit të Shtëpisë së Bamirësisë, dom Simoni merr detyrën e Përgjegjësit të kësaj shtëpie.
Me kalimin në amshim të Bariut të Dioqezës Imzot Luçiano Avgustini, në maj të vitit 2016, dom Simon Kulli zgjidhet Administrator Dioqezan i Sapës.
Me datën 15 qershor 2017, në solemnitetin e Korpit e të gjakut të Krishtit, Ati i Shenjtë Papa Françesku e emëroi për Ipeshkëv të Dioqezës Sapës. Shugurohet Ipeshkëv me 14 shtator 2017 në Katedralen Shën Tereza e Kalkutës në Vau-Dejës. Që në rithemelimin e Dioqezës së Sapës në vitin 2000, Dom Simon Kulli ishte krahu i djathtë i ipeshkvinjëve paraardhës dhe themelues i ringritjes së Strukturave Dioqezane.
