Prokuroria Tiranë ka përfunduar hetimet dhe ka dërguar në gjyq tre persona lidhur me përdorimin e dokumenteve të falsifikuara për të marrë pjesë si vëzhgues në zgjedhjet e datës 11 maj 2025.
Sipas aktakuzës, shtetasi A.P. akuzohet për veprat penale “Falsifikimi i dokumenteve” dhe “Përvetësimi i titullit apo i detyrës shtetërore”, ndërsa shtetasit G.D. dhe M.X. akuzohen për “Falsifikim të dokumenteve”, të kryer në bashkëpunim.
Hetimet zbuluan se A.P. kishte marrë pjesë si vëzhgues në qendrën e votimit në shkollën “9-Vjeçare Vorë” duke përdorur një dokument ‘badge’ të KQZ-së, i cili rezultoi i falsifikuar. Sipas organit te akuzes ky persona nuk ishte i regjistruar si vëzhgues në KQZ dhe nuk dispononte asnjë dokument zyrtar të lëshuar nga ky institucion.
Nga hetimet rezultoi gjithashtu se dokumenti i falsifikuar iu dha A.P. nga shtetasi G.D., Sekretar i Përgjithshëm i Këshillit të Qarkut Tiranë, një ditë para zgjedhjeve. Punonjësja e KQZ-së, M.X., e cila punonte në zyrën e protokollit, ndihmoi në sigurimin e dokumentit fals. Sipas Prokurorisë, përdorimi i këtij dokumenti u krye me vetëdije dhe në bashkëpunim nga të tre personat.
Njoftimi i Prokurorise
Prokuroria pranë Gjykatës së Shkallës së Parë të Juridiksionit të Përgjithshëm, Tiranë përfundoi hetimet dhe dërgon në gjyq shtetasit A.P., për veprat penale ‘Falsifikimi i dokumenteve’ e kryer në bashkëpunim dhe ‘Përvetësimi i titullit apo i detyrës shtetërore’ parashikuar nga nenet 186/2 dhe 246/1 i Kodit Penal si dhe G.D. dhe M.X për veprën penale ‘Falsifikimi i dokumenteve’ e kryer në bashkëpunim parashikuar nga neni 186/2 i Kodit Penal.
Nga hetimet mbi procedimin penal nr.3643, të datës 22.05.2025, rezultoi se shtetasi A.P. ka marrë pjesë si vëzhgues në qendrën e votimit në shkollën ‘9-Vjeçare Vorë’ me dokument ‘badge’ të KQZ-së, i cili nga hetimet rezultoi i falsifikuar.
Në lidhje me ngjarjen, ky shtetas sqaroi se është Sekretar Organizativ i Partisë Socialiste dhe përveç kësaj qendre, kishte detyrë të vëzhgonte edhe 43 qendra të tjera votimi në Bashkinë Vorë. Ai shtoi se dokumenti si vëzhgues iu dha nga shtetasi G.D. me detyrë Sekretar i Përgjithshëm i Këshillit të Qarkut Tiranë një ditë para zgjedhjeve. Shtetasi G.D., pretendoi se e tërhoqi dokumentin ‘badge’ si vëzhgues nga Komisioni Qendror i Zgjedhjeve, ndërkohë që rezulton se nuk ka firmosur ndonjë shkresë për këtë veprim. Hetimet e Prokurorisë pranë Gjykatës së Shkallës së Parë e Juridiksionit të Përgjithshëm, Tiranë, zbuluan se shtetasi A.P. nuk ishte i regjistruar si vëzhgues në KQZ si dhe nuk kishte një dokument zyrtar të lëshuar nga ky institucion.
Nga hetimet rezultoi se dokumenti i falsifikuar u përdor nga shtetasi A. P., ditën e zgjedhjeve të datës 11.05.2025 pranë qëndrës së votimit në ambientet e shkollës “9 – Vjeçare” Vorë me vetëdije dhe veprimi u krye në bashkëpunim me shtetasit G.D. dhe M.X., sekretare në zyrën e protokollit në Komisionin Qendror të Zgjedhjeve, të cilët ndihmuan në sigurimin e dokumentit fals.
Në analizë të fakteve të sipërpërmendura arrijmë në përfundimin se këta shtetas kanë konsumuar veprat penale për të cilat akuzohen.
