Policia e Kolonjës ka zbardhur ngjarjen e rëndë të raportuar më 7 korrik, kur në fshatin Mollas u gjet një kufomë e dekompozuar. Trupi i pajetë u zbulua nga një banor i zonës, i cili njoftoi menjëherë autoritetet.
Pas kryerjes së analizës së ADN-së dhe ekspertizës antropologjike, u bë e mundur identifikimi i viktimës. Bëhet fjalë për një 75-vjeçar nga Korça, i cili rezultonte i zhdukur që prej muajit qershor. Në atë kohë, bashkëshortja e tij kishte kallëzuar pranë Komisariatit të Korçës se kishte humbur kontaktet me të.
Hetimet shkencore kanë treguar se i moshuari vuante nga probleme shëndetësore, konkretisht humbje kujtese (sklerozë), dhe ka ndërruar jetë për shkaqe natyrale në fshatin Mollas, ku më pas u gjet i pajetë.
Policia e Kolonjës vijon punën për dokumentimin e plotë të ngjarjes.
