Gjykata e Posaçme Kundër Korrupsionit dhe Krimit të Organizuar (GJKKO) ka konfirmuar masën e sigurisë “arrest në burg” për Denis Bajrin (Brajoviç), i cili u ekstradua më 23 korrik nga Dubai.
Brajoviç ishte arrestuar në shkurt 2024, pas shpalljes në kërkim në kuadër të operacionit “Metamorfoza”. Në kuadër të këtij operacioni, ndaj tij ishte caktuar masa “arrest me burg” për lidhjet me krimin e organizuar, duke u përfshirë edhe në përgjime me Ervis Martinajn, të njohur si “mbreti i lojërave të fatit”.
Ai ishte subjekt i procedurës OFL për veprat penale “Shtrëngim me anë të kanosjes për dhënien e pasurisë”, dhe “Kryerja e veprave penale nga organizata kriminale”.
Denis Bajri Brajoviç u arrestua fillimisht si pjesë e grupit kriminal “Bajri” në Shkodër, por u lirua nga gjykata e shkallës së parë në Tiranë rreth vitit 2019, duke marrë masën e sigurisë “arrest shtëpie”.
Ai dyshohet si autori i vrasjes së Gjon Ndojt (Boriçi), ngjarje kjo që ndodhi më 9 gusht 2020 në Shkodër. SPAK e akuzon zyrtarisht për këtë krim, në kuadër të operacionit “Metamorfoza”.
