SPAK ka çuar për gjykim Astrit Vladin dhe avokaten Erida Lazimi, të dy të pandehur në dosjen e njohur “Toyota Yaris”, për veprën penale të “Ushtrimit të ndikimit të paligjshëm ndaj personave që ushtrojnë funksione publike”.
Sipas Prokurorisë së Posaçme, ngjarja lidhet me një seancë të zhvilluar më 14 shtator 2020 në Gjykatën e Shkallës së Parë në Tiranë, për gjykimin paraprak të çështjes kundër Alfred Vladit, Elvis Vladit dhe Alban Mollaymerit. Ata akuzoheshin për “Mosdeklarim në kufi i të hollave dhe sendeve me vlerë”, kryer në bashkëpunim.
Nga hetimet rezulton se Astrit Vladi i kishte kërkuar avokates Erida Lazimi që të ndikonte në mënyrë të paligjshme mbi gjyqtarin që do të shqyrtonte çështjen, me qëllim favorizimin e të pandehurve. Lazimi dyshohet se jo vetëm ka pranuar kërkesën, por ka siguruar Vladin se kishte aftësinë për të ndërhyrë te gjyqtari, kundrejt një përfitimi monetar të parregullt.
Ky procedim penal është ndarë nga dosja më e gjerë nr.26/1, datë 26.12.2024, që përfshin akuza të tjera si “Korrupsion pasiv i gjyqtarëve dhe prokurorëve”, “Trafikim narkotikësh” dhe “Pastrim parash”.
Sipas njoftimit zyrtar të SPAK:
• Astrit Vladi akuzohet sipas nenit 245/1, paragrafi (1) të Kodit Penal, në versionin përpara ndryshimeve të ligjit nr.43/2021.
• Erida Lazimi akuzohet sipas paragrafit (2) të po të njëjtit nen dhe version ligjor.
SPAK nënvizon se hetimet për këtë dosje vijojnë, për të zbardhur episode të tjera të dyshuara të korrupsionit aktiv dhe pasiv në sistemin e drejtësisë, si dhe rrethana shtesë të dala gjatë këtij procesi hetimor.
Njoftimi:
Prokuroria e Posaçme kundër Korrupsionit dhe Krimit të Organizuar ka përfunduar hetimet dhe më 24.7.2025, ka dërguar për gjykim procedimin penal, nr.26/1/1 viti 2025 në ngarkim të të pandehurve:
- Astrit Vladi, i akuzuar për veprën penale “Ushtrim i ndikimit të paligjshëm ndaj personave që ushtrojnë funksione publike”, i parashikuar nga neni 245/1, paragrafi (1) të Kodit Penal (sipas përmbajtjes së kësaj dispozite para ndryshimeve të kryera me ligjin nr.43/2021).
- Erida Lazimi, e akuzuar për veprën penale “Ushtrim i ndikimit të paligjshëm ndaj personave që ushtrojnë funksione publike”, e parashikuar nga neni 245/1, paragrafi (2) i Kodit Penal (sipas përmbajtjes së kësaj dispozite para ndryshimeve të kryera me ligjin nr.43/2021).
Ky procedim penal është ndarë nga ai i mëparshëm me nr.26/1, datë 26.12.2024, për veprat penale: “Ushtrim i ndikimit të paligjshëm ndaj personave që ushtrojnë funksione publike”, “Korrupsion pasiv i gjyqtarëve, prokurorëve dhe funksionarëve të tjerë të organeve të drejtësisë”, “Trafikim i narkotikëve”, “Pastrim i produkteve të veprës penale ose veprimtarisë kriminale”, të parashikuara nga nenet 245/1, 319/ç, 283/a dhe 287 të Kodit Penal.
Nga veprimet hetimore të kryera për këtë procedim penal janë mbledhur provat e nevojshme të cilat provojnë se:
Në Gjykatën e Shkallës së Parë Tiranë në datën 14.09.2020 është zhvilluar seanca paraprake për gjykimin e kërkesës për dërgimin në gjyq të procedimit penal nr.71 viti 2020 të Prokurorisë pranë Gjykatës së Shkallës së Parë, Tiranë në ngarkim të shtetasve Alfred Vladi, Elvis Vladi dhe Alban Mollaymeri, të akuzuar për veprën penale “Mosdeklarim në kufi i të hollave dhe sendeve me vlerë” , e kryer në bashkëpunim, të parashikuar nga nenet 179/a dhe 25 të Kodit Penal.
Nga hetimet e kryera është provuar se i pandehuri, Astrit Vladi i ka kërkuar të pandehurës, Erida Lazimi, e cila ushtron profesionin e avokates, të ushtrojë ndikim të paligjshëm te gjyqtari i seancës paraprake, me qëllim për të favorizuar shtetasit, Alfred Vladi etj.
E pandehura Erida Lazimi i ka premtuar dhe i ka siguruar të pandehurit, Astrit Vladi aftësinë për të ushtruar ndikim të paligjshëm te gjyqtari i seancës paraprake, kundrejt përfitimit të parregullt në formë monetare, me qëllim për të favorizuar përsonat, për të cilët ishte kërkuar dërgimi i çështjes në gjyq në atë procedim penal.
Prokuroria e Posaçme kundër Korrupsionit dhe Krimit të Organizuar po vijon hetimet paraprake për episode të tjera të kryerjes së veprave penale të korrupsionit aktiv dhe korrupsionit pasiv të gjyqtarëve, prokurorëve dhe funksionarëve të tjerë të drejtësisë, si dhe rrethanave dhe fakteve të tjera që kanë dalë nga hetimet e kryera lidhur me këtë procedim penal.
