Është arrestuar nga policia 31-vjeçari Klaus Jaçaj, i shpallur në kërkim pas ngjarjes së rëndë të ndodhur më 17 korrik në Sarandë, ku dy të rinj mbetën të plagosur rëndë nga armët e zjarrit.
Sipas policisë, Jaçaj akuzohet për “përkrahje të autorit të krimit” dhe “moskallëzim krimi”, pasi dyshohet se ka ndihmuar të shpëtojë autorin kryesor të sulmit me armë, Ramadan Zoto (alias Ramadan Canaj), i cili vazhdon të jetë në arrati dhe akuzohet për vrasje të mbetur në tentativë.
Në atentatin e 17 korrikut u plagosën rëndë Ernest Lama (24 vjeç) dhe Gëzim Hoxhaj (32 vjeç), të dy nga Tirana. Ata ndodhen ende në kujdesin e mjekëve në Spitalin e Traumës në Tiranë.
Ndërkohë, mbrëmjen e 21 korrikut, tensionet u përshkallëzuan edhe më tej: automjeti i Klaus Jaçajt u hodh në erë me tritol para banesës së tij në Sarandë. Hetuesit po shqyrtojnë nëse shpërthimi është një mesazh nga brenda grupit, një tentativë për hakmarrje apo për të zhdukur prova.
Në kërkim janë ende:
• Ramadan Zoto (43 vjeç) – i dyshuar si autor i plagosjes së dyfishtë,
• Erjon Canaj (36 vjeç) – vëllai i autorit të dyshuar,
• Artan Murtaj (43 vjeç) – të dy nën akuzën për përkrahje të autorit të krimit.
Policia thotë se shkaku i konfliktit ishte një debat banal, që degjeneroi shpejt në përplasje fizike dhe më pas në përdorim të armëve. Grupi hetimor po punon për të zbuluar nëse ngjarja lidhet me pazare të vjetra apo konflikte të tjera kriminale.
Saranda është nën monitorim të shtuar nga strukturat RENEA dhe Operacionalja, për shkak të ngjarjeve të njëpasnjëshme me armë dhe shpërthime gjatë ditëve të fundit.
