Ish-noteri, njëherazi dhe fituesi i Big Brother Vip 2, Luiz Ejlli, është dënuar me një vit burgim pasi akuzohet për falsifikim të dokumenteve.
Ka qenë Gjykata e Shkallës së Parë së Fierit ajo që vendosi burgimin e këngëtarit, së bashku dhe të shtetasit F.A., pasi të dy në bashkëpunim kanë falsifikuar dokumente.
Luiz Ejlli ka falsifikuar deklaratën noteriale për të justifikuar burimin e krijimit të pasurive të shtetasit F.A.. Ky i fundit, i cili asokohe ishte i pandehur, e ka dorëzuar këtë deklaratë noteriale në Prokurori, për t’u përdorur në proceset e tij gjyqësore.
Kjo deklaratë noteriale ishte falsifikuar në përmbajtjen e saj por mbante nënshkrimin e Luiz Ejllit.
Sipas njoftimit zyrtar, është provuar se me të njëjtën datë, numër reporteri e koleksioni që mbante kjo deklaratë noteriale, në regjistrin e noterit Ejlli dhe në arkivin e akteve noteriale të hartuara prej tij, në vitin 2015 ekziston një deklaratë noteriale me palë të ndryshme.
Edhe pse Luiz Ejllit i ishte hequr licenca nga Ministria e Drejtësisë, ish-noteri kishte ruajtur vulat dhe kështu krijoi deklaratën noteriale me të dhëna të pavërteta që do i shërbenin shtetasit F.A.
Me datë 2 tetor Gjykata e Fierit ka zhvilluar seancën gjyqësore, dhe ka deklaruar fajtor fituesin e BBV2 dhe ish-klientin e tij:
Luiz Ejlli akuzohet për veprën penale “Falsifikimi i dokumenteve”, e kryer në bashkëpunim, dënohet me 12 muaj burg
Shtetasi F.A., akuzohet për veprën penale “Falsifikimi i dokumenteve”, e kryer në bashkëpunim, dënohet me 18 muaj burgim.
NJOFTIM
Falsifikuan dokumente për të justifikuar burimin e paligjshëm të pasurive me prejardhje nga aktiviteti kriminal, me kërkesë të Prokurorisë Fier dënohet ish-noteri L.E. dhe shtetasi F.A.
Prokuroria pranë Gjykatës së Shkallës së Parë të Juridiksionit të Përgjithshëm Fier kërkoi dënimin me 12 muaj burgim të ish-noterit E.L., dhe shtetasit F.A. të akuzuar për kryerjen e veprës penale ‘Falsifikimi i dokumenteve’ kryer në bashkëpunim, parashikuar nga neni 186, paragrafi 2 i Kodit Penal.
Në kuadër të hetimeve të iniciuara nga ish Prokuroria pranë Gjykatës së Shkallës së Parë Juridiksionit të Përgjithshëm Lushnjë mbi procedimit penal nr. 388, të vitit 2022, me të pandehur, shtetasit L.E dhe F.A., rezultoi e provuar se i pandehuri F.A., në bashkëpunim me të pandehurin L.E., ish-noter, kanë falsifikuar deklaratën noteriale, të cilën i pandehuri F.A. e ka përdorur në Prokurori, për të justifikuar burimin e krijimit të pasurive të tij, të sekuestruara në kuadër të hetimeve të procedimin pasuror nr. 3 të vitit 2021, të ish Prokurorisë pranë Gjykatës së Shkallës së Parë Juridiksionit të Përgjithshëm Lushnjë.
Deklarat noteriale e hartuar nga i pandehuri L.E., ishte falsifikuar në përmbajtjen e saj, por mbante nënshkrimin e këtij të fundit. U provua se, me të njëjtën datë, numër repertori e koleksioni që mbante kjo deklaratë noteriale, në regjistrin e ish noterit L.E. dhe në arkivën e akteve noteriale të hartuara prej tij, në vitin 2015, ekziston një deklaratë noteriale me palë të ndryshme.
Konkretisht, i pandehuri L.E, megjithëse i ishte hequr licensa nga Ministria e Drejtësisë, duke qenë ende në posedim të vulave të noterit, në bashkëpunim me të pandehurin F.A., kanë krijuar deklaratën noteriale me të dhëna të pavërteta, dhe më pas i pandehuri F.A., në datën 25.02.2022, e ka dorëzuar këtë deklaratë noteriale në ish-Prokurorinë Lushnjë.
Në datën 02.10.2024, Gjykata e Shkallës së Parë të Juridiksionit të Përgjithshëm Fier ka përfunduar shqyrtimin gjyqësor të çështjes dhe vendosur të deklarojë fajtor të pandehurit për faktin e dërguar për gjykim, si më poshtë:
- Deklarimin fajtor të të pandehurit L.E., për kryerjen e veprës penale “Falsifikimi i dokumenteve”, kryer në bashkëpunim, parashikuar nga neni 186 prag.2, i Kodit Penal, dhe dënimin e tij me 12 (dymbëdhjetë) muaj burgim;
- Deklarimin fajtor të të pandehurit F.A, për kryerjen e veprës penale “Falsifikimi i dokumenteve”, kryer në bashkëpunim, dhe dënimin e tij me 18 (tetëmbëdhjetë) muaj burgim.
Prokuroria pranë Gjykatës së Shkallës së Parë Juridiksionit të Përgjithshëm Fier, shpreh angazhimin e plotë për hetimin dhe vënien para përgjegjësisë ligjore të personave që kryejnë vepra penale në fushën e falsifikimit të dokumentave, me qëllim realizimin e përfitimeve në mënyrë të paligjshme.
