Janë zbuluar detaje të reja të rëndësishme nga atentati i një natë më parë (20 korrik), në lokalin e K.Kalemi, ku mbetën të vrarë Shyqyri Kalemi 74 vjeç, klienti Marsel Çela 47 vjeç dhe kamarieri Gledio Muka 36 vjeç. I plagosur mbeti edhe vëllai i 74-vjeçarit, Artur Kalemi 57 vjeç. Mësohet se në mjetin tip “BMW”, që u gjet e djegur këtë mëngjes në fshatin Bejaj të Mallakastrës u konstatuan armë zjarri.
Këto armë mendohen të jenë përdorur përgjatë atentatit, por mbetet për t’u verifikuar më tej nga uniformat blu.
Sakaq, është siguruar fotoja e Shyqyriu Kalemi, shënjestrës për shkak të së cilit ndodhi atentati i trefishtë!
Kujtojmë se rreth orës 23:20, në lagjen nr.3, Memaliaj, në lokalin e K.Kalemit, u bë atentat me armë zjarri, teksa viktima të sulmit mbetën Shyqyri Kalemi (i ati i Andrea Kalemi), Gledio Muka (kamarieri i lokalit) dhe Marsel Çela (klient). I plagosur mbeti Artur Kalemi, i cili është vëllai i Shyqyriut e njëkohësisht xhaxhai i Tiku Kalemit.
Çela dhe Muka janë viktima të cilët nuk ishin nën shënjestrën e autorëve, por u kapën nga breshëria e plumbave, të cilat ishin llogaritur për vëllezërit Kalemi.
Shyqyri Kalemi ishte i ulur në tavolinën e jashtme të lokalit se bashku me vëllain e tij, Artur Kalemi. Pranë tyre ndodhej e 36 vjeçari, Gledio Muka. Ndërkohë klienti i lokalit ndodhej në ambientet e brendshme por nuk i shpëtoi sulmit.
Pak më herët, gazetari Igli Çelmeta, u shpreh në studion e News 24, se dyshohet që atentati të jetë porositur nga Dubai, e se gjithashtu autorët mund të jenë vrasës me pagesë.
SHENJESTRA
Sipas burimeve nga policia dyshohet se shënjestër e këtij atentati kanë qenë anëtaret e fisit Kalemi. Shyqyri Kalemi dhe Artur Kalemi janë të afërt të Adriatik Kalemit, të cilit i janë bërë së paku 3 atentate. Një në një ishull të Greqisë, një në burg dhe një në Shqipëri. Po ashtu në janar të këtij viti i bënë atentat në Unazën e Madhe edhe të vëllait Zamir Kalemit në Tiranë.
PISTAT E HETIMIT
Grupi hetimor po heton si një nga pistat e atentatit të sotëm vazhdimin e sagës së vrasjeve të Aleksandër Sadikaj dhe Edmond Papës. Policia dyshon se Andrea Adriatik Kalemi dyshohet të jetë i përfshirë në vrasjen e Edmond Papës në dhjetor të 2022, ndërsa Sadikaj i cili mbeti i vrarë më herët me tritol brenda makinës ishte i afërm i vëllezërve Kalemi.
KUSH ËSHTË ANDREA KALEMI
Andrea Kalemi në vitin 2001 rezulton i arrestuar nga forcat speciale RENEA dhe ishte shpallur në kërkim ndërkombëtar nga autoritetet belge, pasi akuzohej se në bashkëpunim me vëllain e tij Fatmir Kalemi kishte vrarë vëllezërit Mevlan e Adriatik Çaça, ngjarje e ndodhur në Anderleht, më 13 prill 2001.
Në 2017-ën u arrestua në Tiranë me 2 të tjerë pasi duke qenë edhe nën efektin e alkoolit, kundërshtuan punonjësin e policisë në detyrë, duke prishur rendin dhe qetësinë publike. Dyshohet se u përfshi në vrasjen e Edmond Papës në dhjetor 2022, ndërsa arriti ti shpëtojë dy atentave/
Në gusht të 2023 Andrea Kalemi u tentua të vritej në ishullin Pax të Greqisë, por 51 vjeçari mbeti i plagosur, ndërsa në dhjetor të këtij viti u plagos në një burg grek. Ndërkohë në janar 2024, Zamir Kalemi i shpëtoi atentatit kur persona ende të paidentifikuar qëlluan makinën në të cilën udhëtonte pranë rrethrrotullimit të Selitës në Tiranë. Ai u plagos në këmbë.
Memaliaj/Informacion paraprak
Rreth orës 23:20, në lagjen nr. 3, Memaliaj, në lokalin e shtetasit K. K., në rrethana ende të paqarta janë vrarë me armë zjarri shtetasit Sh. K., 74 vjeç, M. C., 47 vjeç dhe G. M., 36 vjeç si dhe ka mbetur i plagosur shtetasi A. K., 57 vjeç, i cili është transportuar për në spital, për të marrë ndihmë mjekësore.
Shërbimet e Policisë, me marrjen e njoftimit, shkuan menjëherë në vendin e ngjarjes dhe kanë ngritur pika kontrolli në bashkëpunim me Drejtorinë Vendore të Policisë Fier, Berat, Vlorë.
Në drejtim të Memaliajt janë nisur Forcat Speciale Renea, Forcat Kombëtare të Sigurisë si dhe drejtues të lartë të Drejtorisë së Përgjithshme të Policisë së Shtetit.
Nderkohë është ngritur një grup i posaçëm hetimor në drejtimin e Prokurorisë dhe me ekspertë të Departamentit të Policisë Kriminale ku vijojnë punën në vendngjarje për sqarimin e rrethanave të ngjarjes, identifikimin dhe kapjen e autorëve.
Nga veprimet e para hetimore dyshohet se autorët menjëherë pas ngjarjes janë larguar me shpejtësi në drejtim të Mallakastrës me një automjet të cilin dyshohet se e kanë djegur në fshatin Bejaj, Mallakastër.
Forcat Kombëtare të Sigurisë dhe Renea kanë shkuar në vendin ku po digjet automjeti, kanë rrethuar zonën dhe vijojnë kontrollin për kapjen e autorëve.
