Turqia, donatorja e dytë më e madhe në glob

Turqia, donatorja e dytë më e madhe në glob

Turqia vazhdon të jetë një nga donatorët më të mëdhenj humanitarë në rend global, duke shpenzuar miliarda dollarë ndihmë, sipas një raporti të fundit nga Iniciativat e Zhvillimit me bazë në Mbretërinë e Bashkuar (DI). Në vitin 2020, Turqia përbënte 26% të ndihmës humanitare globale , 8,04 miliardë dollarë prej 30,9 miliardë dollarë, me rritje 5,9% mbi bazë vjetore , thuhet në Raportin e Ndihmës Humanitare Globale 2021 të publikuar në fund të qershorit. Ajo renditet e dyta pas SHBA-ve, e cila shpenzoi 8.9 miliardë dollarë, me 6.9% më shumë se 2019. Gjermania, BE dhe Britania e Madhe qëndrojnë më prapa, përkatësisht me 3.7 miliardë dollarë, 2.6 miliardë dollarë dhe 2.1 miliardë dollarë. Turqia renditet e para nëse merren parasysh të ardhurat kombëtare.

Shpenzimet e saj për ndihmë humanitare ishin 0.98% të PBB-së së vendit , pasuar nga Luksemburgu me 0.19%, Suedia dhe Norvegjia secila me 0.16% dhe Danimarka me 0.15%. Turqia u rendit e treta në raportin DI në 2013, 2014 dhe 2015, e dyta në 2016 dhe e para në 2017, 2018 dhe 2019. Ajo pret gati 4 milionë refugjatë, më  shumë se çdo vend në botë.

Numri i sirianëve nën mbrojtje të përkohshme në Turqi është 3.68 milionë. Raporti nënvizon se Siria ishte marrësi më i madh i ndihmës në vitin 2020, duke marrë 2.6 miliardë dollarë. Jemeni mori 2.15 miliardë dollarë, Libani 1.56 miliardë dollarë, Sudani i Jugut 1.38 miliardë dollarë dhe Republika Demokratike e Kongos 1.05 miliardë dollarë. “COVID-19 ka rritur shtysën për përmirësimin e efektivitetit dhe efikasitetit të reagimit humanitar”, thuhet në raport. Senol Topal, koordinatori i Idlibit për Fetihder, një shoqatë turke e ndihmës humanitare, preku situatën aktuale të Idlibit në Siri, duke thënë se rreth 4 milionë njerëz në rajon kanë nevojë për ushqim, ilaçe dhe materiale ndërtimi. “Ndihma nga vendet e tjera në Siri sigurohet përgjithësisht nga qeveritë, dhe jo nga njerëzit, dhe është e pamjaftueshme”, tha ai.