Nuk ka fitues në sfidën hapëse të javës së dytë, Laçi i merr një pikë Dinamos në “Elbasan Arena”

Nuk ka fitues në sfidën hapëse të javës së dytë, Laçi i merr një pikë Dinamos në “Elbasan Arena”

Dinamo nuk arrin të bëjë “bis” fitoresh në start pas rikthimit të Superiore. Pas fitores në javën e parë ndaj Kastriotit në Kamëz, Blutë e kryeqytetit nuk shkuan më shumë se një barazim 1-1 ndaj Laçit në javën e dytë, sfidë e luajtur në stadiumin “Elbasan Arena”.


Pas një pjese të parë më shumë duke studiuar njëri-tjetrit, ekipet luajtën më të hapura në të dytën. Të besuarit e Bledi Shkëmbit shënuan të parët në minutën e 53-të pas një autogoli të Shehut. Ishin minuta të mira të Dinamos, që mund të kishte shënuar edhe golin e dytë.

Pastaj kurbinasit hidhen në sulm për të gjetur golin e barazimit. Dinamo mbrohet mirë, por i mungon shkathtësia në kundërsulm për të vrarë ndeshjen me një gol të dytë.

Dhe në minutën e fundit të takimit Laçi barazon shifrat. Roganoviç realizon supergol nga distanca pas një skeme mjaft të bukur. E djathta e malazezit ishte e pakapshme për portierin Harizajn. Mbyllet 1-1, Dinamo shkon në 4 pikë, ndërsa kurbinasit marrin pikën e parë.

TAGS