THUMB: Fyle erdhi në Shkup për hulumtim shkencor

Eurokomisari Shtefan Fyle (Štefan Füle, i lindur në vitin 1962 në Sokolov, Çeki) sot ka ardhur pa paralajmërim në Maqedoni dhe është takuar me disa zyrtarë. THUMB nuk arriti të mësojë arsyen se pse qëndron Fyle në një vizitë rrufe dhe nëse është takuar me ndonjë zyrtar shqiptarë. Nga partia qeverisëse shqiptare nuk ka ndonjë lajmërim por sipas asaj që flitet në kuloaret shkencore të Shkupit,  Fyle këtë herë ka zbarkuar në Shkup, për të hulumtuar kuptimin e emërtimit të vendlindjes së tij “Sokolov”. 

Albanologët që i konsultuam ne, tregojnë se nuk ka nevojë për panik apo mëdyshje se pse është takuar vetëm me liderë maqedonas pasi ky kishte ardhur vetëm për arsye sllavistike dhe gjuhësore. Ata më tej sqarojnë edhe atë se ndonëse fjala sokol është edhe në shqip; (1. zool. Shpend grabitqar me sqep të kthyer dhe me krahë e thonj të fuqishëm; petrit. 2. fig. Djalë a burrë, zakonisht shtathedhur, trim e i zoti, petrit.) Toponimi “Sokolovo” nuk ka të bëjë me sferën e shtrirjes iliro-pelazge por është një toponim sllav.

________________________________________________________________________________

Lajmet, informacionet, analizat që lexoni më lartë NUK JANË TË VËRTETA, faktike dhe reale. Këto janë kontribut përqeshësh për faktet dhe realitetet e hidhura që kontribuesit e THUMB mendojnë se janë më lehtë të kuptueshme në këtë mënyrë ironike. Kontributet, idetë dhe materialet mund ti dërgoni në:  almakoss@gmail.com