6 Shqiptarë te Juventus

Jo vetëm skuadrat zvicerane janë të populluara me futbollistë shqiptarë. Edhe në Itali është duke u krijuar një ‘modë’ e tillë dhe kjo, jo më pak se te kampioni i futbollit të këtij vendi, skuadra e Juventusit. ‘Zonja e Vjetër’ nga Torino numëron gjashtë shqiptarë, që nga kategoria e të rinjve deri te skuadra e parë.

Vitin e kaluar, Juventus transferoi nga Empoli talentin shqiptar, Elvis Kabashi, për afro 3 milionë euro, duke u konsideruar njëri nga talentët më me perspektivë në futbollin italian. Madje, ai u përfshi këtë vit edhe në skuadrën e parë të Antonio Kontes, mirëpo vetëm në stolin rezervë. Siç po shkojnë punët, mund të pritet debutimi i tij gjatë këtij viti me skuadrën e parë të ‘bardhezinjëve’.

Përveç Kabashit, në mesin e futbollistëve shqiptar në këtë klub është edhe mesfushori Françesko Tahiraj. Talenti 16-vjeçar, Tahiraj, luan me skuadrën U17 të Juves. “Jam pjesë e Juventusit me skuadrën deri në 17-vjeç. Punët janë duke ecur mirë për mua. Deri tani, edhe ndeshjet kanë qenë të mjaftueshme për të treguar cilësitë e mia”, deklaroi në një prononcim për gazetën ‘Tribuna’, mesfushori shqiptar.

Ai theksoi se ndihet i lumtur me faktin se janë pesë shqiptarë tani që veshin fanellën e skuadrës së madhe italiane. “Tani në skuadër jemi pesë futbollistë shqiptarë. Jemi unë, Entonio, Elvisi, Alesio, si dhe Armando. Jam i lumtur për një fakt të tillë”, u shpreh Tahiraj. Entonjo Elezaj luan si portier, po ashtu me skuadrën U17, ndërsa pjesë e Juves është edhe dyshja Alesio Mema dhe Armando Sylka.

Në verë vjen Maloku

Për të çuar në gjashtë numrin e futbollistëve shqiptarë te Juventusi, u përkujdes Elvir Maloku. Ky i fundit ka nënshkruar kontratë me skuadrën e famshme italiane, ndërsa do t’i bashkohet asaj gjatë merkatos së verës. Futbollisti 16-vjeçar u transferua te Juvja nga kroatët e Rijekës, ndërsa po kërkohej edhe nga disa skuadra të tjera evropiane. “Ai ende nuk është bashkuar me ne. Po flitet se e kanë marrë, ndërsa do të bashkohet me ne gjatë verës”, njoftoi Tahiraj për ardhjen e bashkëvendasit të tij te Juve.