Bajraktaraj në film me Gérard Depardieu

Aktori i talentuar kosovar Arben Bajraktaraj është bërë tashmë një aktor me përmasa evropiane, i njohur për rolet e tij në pjesën e parë të filmit amerikan “Taken”, krahas aktorit të shquar, një nga yjet e Holivudit, Liam Nelson, dhe në dy seritë e “Harry Potter”.

Regjisori francez Jean-Piere Améris ka vendosur të shkrijë në shirit filmik veprën romantike të Viktor Hygo, që cilësohet si ''mrekullia romantike'' e tij.  

E njëri prej roleve kryesore në këtë film, xhirimet e të cilit tashmë kanë nisur, është rezervuar për aktorin kosovar që jeton në Francë, Arben Bajraktaraj.

”Për mua roli i Hardquanonne është shumë i respektueshëm sepse është një personazh i rëndësishëm në novelë”, shprehet aktori i shquar Arben Bajraktaraj për mediat shqiptare.

Aktorët e njohur Gérard Depardieu, Emmanuelle Seigner e kanadezi Marc-André Grondin janë treshja e yjeve që përbëjnë kastën e aktorëve në filmin “The man who laughs”, premiera e të cilit pritet të jepet në fund të këtij viti ose në fillim të 2013-s.