Thaçi pret yllin e Eurovizonit, Rona Nishliun

Këngëtarja e Eurovizionit, Rona Nishliu është pritur të enjten nga kryeministri Hashim Thaçi. Kjo vjen pas suksesit në Festivalin Evropian të Këngës "Eurovizion 2012", ku Rona u rendit e pesta në natën finale.

Në emër të Qeverisë, kryeministri Thaçi i shprehu këngëtares Nishliu urimet më të thella për suksesin dhe përfaqësimin dinjitoz të vlerave të Kosovës nën flamurin kombëtar shqiptar në festivalin “Eurovizion 2012”.

“Me interpretimin tuaj të veçantë dhe shumë profesional, me emocionet prej një artisteje të vërtetë, treguat cilësi kulmore, duke u vlerësuar lartë prej publikut evropian dhe prej profesionistëve evropianë të muzikës” i tha me këtë rast kryeministri Thaçi solistes së talentuar Rona Nishliu.

Sipas kryeministrit Thaçi, kjo është dëshmia më e mirë që të rinjtë e Kosovës kanë vlera dhe potencial të madh në të gjitha fushat, posaçërisht në kulturë, art, shkencë dhe sport.

Sipas Thaçit, Qeveria po punon që në një periudhë të afërt të rinjtë tanë të kenë mundësi të përfaqësojnë Republikën e Kosovës në gara të ndryshme anë e kënd botës.

Ndërsa, këngëtarja Rona Nishliu e ka falënderuar Qeverinë e Kosovës për mbështetjen e treguar.