Zyrtare, ja kandidati për President i Shqipërisë

Parlamenti do të votojë nesër kandidaturën e gjyqtarit Xhezair Zaganjori për president të Republikës. Ai mban aktualisht detyrën e anëtarit të Gjykatës Kushtetuese. Për të marrë detyrën e presidentit, Zaganjori duhet të marrë 84 vota në parlament, ccka duket se ka pak gjasa nëse i referohemi qëndrimit të Partisë Socialiste.

Në rast se në garë do të futet edhe një kandidat tjetër, atëhere në fazën tjetër do të kalojë ai që merr më shumë vota. Zaganjori ka lindur në vitin 1957 në Shkodër dhe është diplomuar në Fakultetin e Drejtësisë të Universitetit të Tiranës në vitin 1981.

Që nga kjo kohë ai ka qenë lektor i së Drejtës Ndërkombëtare Publike, i të Drejtës Europiane dhe i të Drejtave të Njeriut në Fakultetin e Drejtësisë të Universitetit të Tiranës, në Shkollën e Magjistraturës dhe në Shkollën e Studimeve Europiane, Tiranë. Gjatë viteve 1992-1997 ka qenë Ambasador i Republikës së Shqipërisë në Gjermani. Në vitin 1993 merr gradën shkencore “Doktor i Shkencave Juridike” dhe në vitin 2009 “Profesor”. /albeu