Sula: Eduard Selamim e ftoi Berisha

Deputeti i Partisë Demokratike i qarkut të Elbasanit, Dashnor Sula, gjykon se ish –kreu i PD-së, Eduard Selami, mund të kandidojë për deputet në Tiranë ose Elbasan.

“Shumë sinqerisht e deklaroj se listat për deputetë nuk janë monopol i asnjë  deputeti, kushdo qoftë ai, edhe me dy apo tre mandate. Ky vendim i përket kryesisë së PD-së, e cila gjykon për performancën e kandidatëve që do të jenë pjesë e listës për deputetë. Absolutisht nuk kam asgjë kundër dhe kontributi i z.Selami mund të jetë edhe në Tiranë, por mund të jetë edhe në Elbasan, apo në ndonjë qark tjetër. Por e padiskutueshme  është që z.Selami është një vlerë e shtuar në PD dhe do të ndikojë pozitivisht në mbledhjen e votave të së djathtës,” shprehet Sula për “GSH”-në.

Sipas tij: “Z.Selami mirëpritet nga demokratët e parë të Lëvizjes së Dhjetorit, por edhe të gjithë demokratët e tjerë, të cilët e kanë vlerësuar sërish. PD-ja pas vitit’97 ka qenë totalisht e hapur dhe kjo është një meritë padyshim e z.Berisha si kryetar i PD-së, si një person që mbajti gjallë, fuqishëm PD-në, e cila në vitin ’97 ka qenë në momentet më të vështira, por të mos harrojmë që nga viti 2001 e këtej kemi pasur një ndërthurje të figurave qëndrestare, por kanë vazhduar edhe prurje të reja si z.Basha, znj.Bregu etj, të cilat brenda PD-së jetojnë si një familje e madhe”.

Sipas Sulës nuk duhet të ketë radikalizëm brenda grupit parlamentar për kandidatë për deputetë, por: “Nuk jam për atë  që duhet të jetë shkëndija apo zilja e z.Berisha ajo që duhet t’i nxisë dhe të tregojë rrugët dhe detyrat që duhet të bëjë secili deputet”.

Ai shprehet i bindur në fitoren e PD-së dhe se FRD nuk do të ketë asnjë ndikim për koalicionin pas zgjedhjeve të 23 qershorit.