Vazhdojnë polemikat BDI-PDSH, bashkangjitet edhe DR

Deputeti i PDSH-së Bekim Fazliu ka akuzuar BDI-në se merret me imagjinata kur është fjala siç thotë, “për punësimet e shqiptarëve”. 

“Kjo imagjinatë, ndoshta i bën të besojnë se me të vërtetë ata kanë realizuar 9 mijë punësime për shqiptarët. Për dallim nga BDIne nuk merremi me imagjinata, shqiptarët përjetojnë një realitet të hidhur të përditshëm. Imagjinatat e BDI-së dhe të liderit të tyre, ua bëjnë jetën shumë të rëndë me përplot probleme. 9 mijë punësimet imagjinare, në realitet janë 0 punësime”, ka akuzuar Fazliu. “Përfaqësimi i drejtë dhe adekuat i shqiptarëve me BDI-në jo që shënon rritje por përkundrazi shënon rrënje drastike”, ka shtuar Fazliu.  

Rilindja Demokratike Kombëtare (RDK) ka reaguar ndaj deklaratës së dhënë nga kreu i BDI-së, Ali Ahmeti, lidhur me rregullimin e përdorimit të gjuhës shqipe.

“RDK shpreh habinë se si Kryetari i BDI-së, i cili gjatë fushatës së kaluar, më 17 maj 2011 në Kumanovë vet deklaroi se  ‘ky është vërtetë mandati në të cilin çështja e gjuhës shqipe sërish vendoset në bankat e Parlamentit të Maqedonisë për zgjidhje përfundimtare’, pardje, pa e vrarë shumë mendjen, u shpreh se kjo çështje është lënë për në mandatin e ardhshëm! RDK është e habitur që një deklaratë e tillë vjen pas katër vitesh mburrje nga BDI me ligjin e saj të dështuar për gjuhët, për të cilin koha po dëshmon se është bërë pengesë për përdorimin e gjuhës shqipe”, thuhet në reagimin e RDK-së.

Bashkimi Demokratik për Integrim është përgjigjur vetëm ndaj PDSH-së. “Vet fakti që përfaqësimi i shqiptarëve ka lëvizur vetëm 1% në kohën kur PDSH uzurpoi institucionet e vendit pa vullnetin e shqiptarëve, por me vullnetin e VMRO-së, flet mjaftueshëm për kredibilitetin dhe moralin e PDSH-së dhe eksponentëve të saj. Nëse këtyre fakteve të pamohueshme ju shtohen edhe veprimet antikombëtare të PDSH-së bashkë me kasaphanën ndaj shqiptarëve në 16 muajshin më të zymtë për shqiptarët, atëherë bëhet e qartë se pse shqiptarët kanë votuar kundër PDSH gjatë gjithë kohës sa edhe ekziston kjo parti e dështuar” shkruhet në reagimin e BDI-së.

Kjo parti vlerëson se raportet e institucioneve të pavarura flasin qartë rreth përfaqësimit të drejtë dhe adekuat. /almakos