Do të prishet gjysma e kishës në Kalanë e Shkupit

Një pjesë e Kishës në Kala, do të prishet dhe objekti do të redifinohet. Ai nuk do ti kalojë lartësinë e mureve të kalasë dhe nuk do të ketë  asnjë simbol fetar. Kjo është një nga pikat e marrëveshjes së arritur mes drejtorit të  Drejtorisë për Mbrojtjen e Trashëgimisë Kulturore, Pasko Kuzman, drejtorit të Qendrës Nacionale për Konservim, Mehmet Selmani, kryetarit të Komunës së Çairit, Izet Mexhiti dhe deputetit të Bashkimit Demokratik për Integrim (BDI) Behixhudin Shehapi, anëtar i Komisionit për Kulturë në parlament.  Po ashtu pjesë e marrëveshjes së arritur është  redefinimi i projektit për ndërtimin e tre muzeve në Kalnë e Shkupit dhe emërtimi i tyre.  Nuk do të ketë kullë osmane, por muze të periudhës osmane, i  cili do të ndërtohet mbi themelet e Xhamisë së Kalasë, hartën e ekzistimit të së cilës e publikoi “Lajm” para disa ditëve.  Sipas marrëveshjes është paraparë që të mos vazhdohen punimet për përfundimin e objektit të parë, derisa dy objektet e tjera të arrin në të njëjtin nivel të ndërtimit. 

Deputeti Behixhudin Shehapi konfirmon marrëveshjen e arritur dhe thotë se ajo është rezultat I bashkëpunimit konform standardeve të UNESKO-s, rregullativës ligjore, konventës së Venedikut dhe aspektit multi-kulturor dhe multi-civilizues edhe të shtetit edhe të Kalasë së Shkupit. “Nuk do të ketë kishë në kala dhe nuk do të ketë xhami në kala, por do të ketë muzeu mesjetar të  ndërtuar mbi themelet e kishës bizantine, muzeu të periudhës osmane që do të ndërtohet  mbi themelet e xhamisë së Kalasë dhe muze i periudhës  prehistorike që do të ndërtohet mbi themelet e shtëpisë dardane”, thotë  për “Lajm” Shehapi. Asnjëri nga objektet muze që do të ndërtohen në kala nuk do të ketë asnjë simbol fetar. 

Marrëveshja e re e arritur mes krerëve të këtyre institucioneve vjen pas problemeve që shkaktoi ndërtimi i objektit kishë në Kalanë e Shkupit. Pas ridefinimit të projektit për ndërtimin e muzeut të periudhës osmane dhe muzeut të periudhës prehistorike do të ketë edhe një ekspertizë. Shehapi thotë se nëse nuk respektohet marrëveshja e arritur, nuk do të lejojnë që të vazhdojë ndërtimi i objektit të parë. Tre objektet muze, edhe pse nuk do të kenë simbole fetare do të ndërtohen në stilin e periudhave që u takojnë.  Për moment në Kalanë e Shkupit nuk po punohet asgjë. 

Gërmimet dhe ndërtimet në Kalanë e Shtupit kanë shkaktuar mjaft tensione në Shkup. Mënyra e organizimit të gërmimeve arkeologjike ku u përdorën edhe buldozerë, si dhe ndërtimet në këtë qendër arkeologjike kanë shkaktuar mjaft polemika.  /lajm