Fatmir Besimi ndan çmime për gazetarë, shpërblen 7 persona, vetëm një shqiptar

Ministri i Mbrojtjes, Fatmir Besimi do t'ua ndajë çmimet në të holla fituesve të tri fotografive dhe tri teksteve gazetareske të para, në Konkursin për përzgjedhjen e fotografisë më të mirë dhe tekstit më të mirë gazetaresk.

Në konkursin për zgjedhjen më të mirë të tekstit gazetaresk me temë "Armata e Republikës së Maqedonisë në promovimin e paqes, reformat, integrimet euroatlantike dhe bashkëjetesa" kanë arritur nëntë punime gazetareske.

Vendin e parë dhe çmimin prej 30.000 denarë e fitoi Sveto Stamenov nga Radioja e Maqedonisë-Radio Shkupi për kronikën në radio "Kontributi i Republikës së Maqedonisë në misionet ndërkombëtare paqeruajtëse". Vendi i dytë dhe çmimi prej 20.000 denarë i takuan Miomir Serafinoviq nga Televizioni Kanal 5 për kronikën "Një zonjë dhe tre burra në gjeneratën e parë të pilotëve në Maqedoni": çmim prej 20.000 denarë, ndërsa pozita e tretë dhe 10.000 denarë i fitoi Arben Zeqiri nga gazeta "Koha" për tekstin "Shqiptarët e ARM-së e ruajnë paqen botërore".

Temë e konkursit për përzgjedhjen e fotografisë më të mirë ishte "20 vjet Armata e Republikës së Maqedonisë", ndërsa çmimin e parë dhe 30.000 denarë i fitoi Sllobodan Gjuriq për fotografinë "Dielli". Pozita e dytë dhe çmimi prej 20.000 denarë i takuan Maja Zlatevskas për fotografinë "Mbijetimi me ujqit". Pozitën e tretë e ndanë Naqe Batev për fotografinë "Mbijetimi me renxherët" dhe Mirko Ordev për fotografinë "Pritja e paqeruajtësve". Të dy e fituan çmimin prej 10.000 denarë.