Gruaja e Aganit, “bosi” i Gjinekologjisë

Shpresa Agani, gruaja e ministrit të Shëndetësisë Ferid Agani, është bërë “ministre” e Gjinekologjisë.

Ajo punon në Klinikën Obstetrike-Gjinekologjike të Qendrës Klinike Universitare të Kosovës dhe është bërë e padurueshme për një pjesë të kolegëve të saj me të cilët punon në këtë klinikë.

Sipas kolegëve të saj, ajo hyn dhe del kur të dojë në klinikë dhe orarin e punës e bën vetë, shkruan “Zëri”.

“Ajo sillet sikur bos dhe nuk ia ndien për askënd. Vjen sa herë që i teket dhe punon vetëm atëherë kur i teket. Ajo as për kujdestari nuk mërzitet. Kjo situatë ka ndodhur që prej se në krye të shëndetësisë kosovare ka ardhur burri i saj Ferid Agani” ka thënë në kushte anonimiteti një nga mjekët e kësaj klinike.

Mosardhjen në punë sipas kontratës, nuk e ka mohuar as drejtori i Klinikës Obstetrike-Gjinekologjike në QKUK, Shefqet Lulaj.

Ai e ka pranuar që Shpresa Agani është e parregullt në punë.

E kjo e fundit i ka mohuar akuzat, duke thënë se i dëgjon për herë të parë.

Ajo ka thënë se është e përgjegjshme në punë dhe se respekton kolegët e saj.