Rritje e numrit të gazetarëve të arrestuar dhe të vrarë në mbarë botën

Numër rekord gazetarësh gjatë vitit 2012 janë arrestuar në mbarë botën, që tregon se situata kur bëhet fjalë për lirinë e mediave është gjithnjë e më e keqe, kumtoi sot Komiteti për mbrojtjen e gazetarëve.

Ky grup, me seli në Nju-Jork, në raportin e tij vjetor të titulluar "Sulmi mbi shtypin", kumtoi se vitin e kaluar janë arrestuar 232 gazetarë, "zakonisht me akuzën për terrorizëm, por edhe aktivitete të tjera antishtetërore".

Në raport theksohet se ky është numri më i madh i gazetarëve të arrestuar që nga raporti i parë i Komitetit, të publikuar në vitin 1990, transmetuan mediat amerikane.

Në kryerje të detyrës, gjithashtu, vitin e kaluar janë vrarë edhe 70 gazetarë, që është për 43 për qind më shumë se në vitin 2011.

"Lufta për kontrollin e informacioneve është sulm i përgjegjësisë civile që nuk mund të tolerohet. Qeveritë duhet t'i gjykojnë fajtorët dhe t'i ndalojnë ata që përpiqen t'i pamundësojnë opinionit të kenë pasqyrë për njoftimin kritik dhe objektiv", njofton drejtori i Komitetit, Robert Mahoni.

Raporti e përfshin edhe "Listën e rrezikshme" me 10 vende, të cilat në vitin 2012 kanë qenë më të rrezikshmet për gazetarët. Sipas saj, rritje të numrit të gazetarëve të vrarë është vërejtur në Pakistan, Somali dhe Brazil, më së shumti u kanosen gazetarëve në Ekuador, Turqi dhe Rusi, ndërsa më shumë janë arrestuar në Etiopi, Turqi, Vietnam, Iran dhe Siri.

Vendi më vdekjeprurës për gazetarët në vitin 2012, megjithatë, ishte Siria, ku janë vrarë 28 gazetarë, shtohet në raportin e Komitetit.