Mark Leonard: Greqia dhe Qiproja sillen në mënyrë destruktive

Greqia dhe Qiproja, edhe krahas ndihmës ekonomike që e morën nga Bashkimi Evropian, akoma i pengojnë prioritetet evropiane, siç është zgjerimi me vendet e Ballkanit, vlerësoi Mark Leonard, drejtor i Këshillit Evropian për marrëdhënie të jashtme (ECFR), qendër analitike me ndikim me seli në Londër.

Leonard foli në institutin "Brukings" në Uashington, në panel-diskutimin për politikën e jashtme evropiane dhe daljen nga kriza të eurozonës, me ç'rast kujdes u është kushtuar edhe problemeve në zgjerimin e Bashkimit Evropian.

"Greqia dhe Qiproja morën ndihmë të madhe nga BE-ja, por akoma janë tërësisht destruktive në shumë aspekte të politikës së jashtme. Kemi çështje në fillim të krizës nëse kjo dinamikë do të ndryshojë me krizën, por për fat të keq, duket se Evropa nuk ka kurrfarë ndikimi mbi grekët e Ballkanit", deklaroi Leonard.

Për shkak të kundërshtimit të Greqisë dhe të Qipros, Leonard vlerësoi se zgjerimi i Bashkimit Evropian është vështirësuar, duke thënë se pranimi i Turqisë, për shembull, është vetëm çështje teorike jo edhe mundësi praktike.

Drejtori i ECFR-së, këshill i cili është i formuar që ta vlerësojë politikën e jashtme evropiane, vlerëson se pas pranimit të pritur të Kroacisë në Bashkimin Evropian, çdo zgjerim i ardhshëm do të zhvillohet me debate serioze.

"Kroacia u fut pothuajse në mënyrë të fshehtë në BE, nuk pati shumë debat për pranimin e saj. Mendoj se ai është vendi i fundit i cili do të hyjë në këtë mënyrë. Unë jam mbështetës i madh i zgjerimit të BE-së, por mendoj se duhet të ketë debat serioz dhe të fitohet mbështetje që të ketë zgjerim", vlerësoi Mark Leonard në diskutimin në institutin "Brukings".