“Facebook” hidhet në gjyq për butonin “like”

Vejusha e një programuesi holandez po kërkon dëmshpërblim nga “Facebook” për përdorimin e një teknologjie të patentuar. Ajo pretendon se bashkëshorti i saj që u nda nga jeta disa vite më parë, e pati shpikur konceptin e butonit “like” shumë më parë se sa “Facebook” dhe se një pjesë e madhe e suksesit të këtij rrjeti social vjen pikërisht si pasojë e kësaj shpikjeje.

Kompania në emrin e të cilës u regjistrua shpikja në vitin 1998 quhet “Rembrandt Social Media” dhe shpikësi quhej Van Der Meer. “Facebook” tha se nuk ka komente për momentin. Kërkesa për dëmshpërblim u dorëzua në një gjykatë federale në Virxhinia.

“Ne besojmë se patentat e Rembrandt përbëjnë themelin e medias shoqërore siç e njohim sot dhe presim që një gjykatës dhe një juri të arrijë në të njëjtin konkluzion bazuar te provat”, tha avokati i palës paditëse.

Van Der Meer pati krijuar një rrjet shoqëror të quajtur “Surfbook” para vdekjes së tij në vitin 2004. Ai e pati regjistruar patentën pesë vjet para se “Facebook” të fillonte ekzistencën e vet.

“Surfbook” ishte një ditar shoqëror që u lejonte njerëzve të ndanin me njëri-tjetrin informacion dhe të miratonin disa të dhëna duke përdorur një buton “më pëlqen”. Akuza pretendon gjithashtu se “Facebook” ishte i vetëdijshëm për ekzistencën e kësaj patente.